რა უფლებებით სარგებლობს მოგირავნე?

გირავნობა ძალიან აქტუალური საკითხია,ამიტომაც საინტერესოა როგორ აწესრიგებს საქართველოს კანონმდებლობა გირავნობის უფლებებს.

სამოქალაქო კოდექსით განსაზღვრული სანივთო უფლებებიდან ერთ-ერთს წარმოადგენს გირავნობა. კანონის თანახმად, გირავნობა არის კრედიტის უზრუნველყოფის ისეთი საშუალება, რომლის ძალითაც კრედიტორს (მოგირავნეს) ენიჭება უფლება, დაიკმაყოფილოს თავისი მოთხოვნა დაგირავებული ქონების რეალიზაციით ან მასზე საკუთრების მოპოვებით, მოვალის მიერ ვალდებულების შეუსრულებლობის ან არაჯეროვნად შესრულების შემთხვევაში.

გირავნობის უფლება შეზღუდული სანივთო უფლებაა, რომლითაც მხოლოდ მოძრავი ნივთები და არამატერიალური ქონებრივი სიკეთეები იტვირთება. გირავნობის უფლება ვრცელდება ნივთის არსებით შემადგენელ ნაწილებსა და ნაყოფზე. აგრეთვე, რეგისტრირებული გირავნობის საგანი შეიძლება იყოს ქონება, რომელსაც დამგირავებელი მომავალში შეიძენს. გირავნობის უფლებით უზრუნველყოფილია, როგორც მთავარი მოთხოვნა, ასევე, მასთან დაკავშირებული სხვა დამატებითი მოთხოვნები, როგორიცაა, პროცენტი და პირგასამტეხლო. გირავნობა უზრუნველყოფს განსაზღვრულ ვალდებულებას, რომლის გარეშეც ის ვერ არსებობს. თუ ძირითადი უფლება არ წარმოიშობა გარიგების ბათილობის ან სხვა საფუძვლით, გირავნობაც არ ითვლება წარმოშობილად.

გირავნობა უზრუნველყოფს კრედიტორის მოთხოვნას, რომელიც არ არის აუცილებელი, რომ ფულადი სახით იყოს წარმოდგენილი, თუმცა აუცილებელია შესაძლებელი იყოს მისი ფულადი ფორმით გამოხატვა.

გირავნობის მონაწილე არანაკლებ ორი და არაუმეტეს ოთხი პირი შეიძლება იყოს. მოგირავნე (კრედიტორი) ყოველთვის უზრუნველყოფილი მოთხოვნის მფლობელია, ხოლო უზრუნველყოფილი მოთხოვნის მოვალე, ამავდროულად, ჩვეულებრივ, გირავნობის საგნის მესაკუთრე და დამგირავებელია.

თუ დამგირავებელი აგირავებს საკუთარი ვალისათვის სხვის ნივთს,მაშინ ნივთის მესაკუთრე „მესამე პირად“ მოიხსენიება, რადგან ის არ ხდება გირავნობის ხელშეკრულების მხარე;

იმ შემთხვევაში თუ დამგირავებელი სხვისი ვალისათვის საკუთარ ნივთს აგირავებს ნივთის სხვის სასარგებლოდ დამგირავებელი მესაკუთრე გირავნობის ხელშეკრულების მხარეა და არა მესამე პირი, თუმცა დამგირავებლის სტატუსი, მას, ამავდროულად, არ აქცევს მოგირავნის პირად მოვალედ.

არსებობს მფლობელობითი გირავნობა და რეგისტრირებული გირავნობა.მფლობელობითი გირავნობის დროს მხარეთა შეთანხმებით დაგირავებული მოძრავი ნივთი გადადის კრედიტორის მფლობელობაში, ხოლო რეგისტრირებული გირავნობის დროს საჭიროა მხარეთა წერილობითი შეთანხმება და გირავნობის უფლების რეგისტრაცია შესაბამის ორგანოში,რა დროსაც გირავნობის საგნის გადაცემა მოგირავნის მფლობელობაში სავალდებულო არ არის.

მოგირავნის დაკმაყოფილება ხდება გირავნობის გირავნობის საგნის რეალიზაციით (გაყიდვით) ან მოთხოვნის დაკმაყოფილების მიზნით დაგირავებული ნივთის მოგირავნის საკუთრებაში გადაცემის გზით, თუ კანონით სხვა რამ არ არის გათვალისწინებული.

დამატებითი ინფორმაციის მიღების მიზნით დაუკავშირდით საერთაშორისო საადვოკატო კომპანია ,,ნაკაშიძე&პარტნიორები/ Law Office Nakashidze&Partners''-ს.

ვუზრუნველვყობთ თქვენს დაცვას/წარმომადგენლობას: საქართველოსა და იტალიაში ყველა ინსტანციის სასამართლოში; ადმინისტრაციულ ორგანოებში,საელჩო,საკონსულო,იუსტიციის სახლში და სამინისტროებში; სამართლებრივი ურთიერთობის რეგულირებას ფიზიკურ და იურიდიულ პირებთან;სტრასბურგის-ადამიანის უფლებათა ევროპულ სასამართლოში.