მემკვიდრეობის დავა: რა შეგიძლია გააკეთო, თუ ძმამ ქონება შენი თანხმობის გარეშე გადაიფორმა?

ხშირად საქართველოში მემკვიდრეობითი დავები ოჯახურ კონფლიქტად იქცევა. განსაკუთრებით მაშინ, როცა ერთი მემკვიდრე ქონებას მთლიანად საკუთარ სახელზე აფორმებს და სხვების უფლება ირღვევა.

ასეთი შემთხვევა მოყვა ადმინისტრაციულ, სამოქალაქო საქმეებსა და ბავშვთა უფლებებში სპეციალიზებულმა ადვოკატმა ნათია ნაკაშიძემ, რომელიც გვიყვება ერთ-ერთი ქალბატონის ისტორიას:

„მამის გარდაცვალების შემდეგ ჩემმა ძმამ სამკვიდრო გახსნა და სოფლის ქონება: ორი მიწის ნაკვეთი და სახლი - მთლიანად საკუთარ სახელზე გადაიფორმა ისე, რომ ჩემთან არც კითხულობდა, ჰყავდა თუ არა მამას სხვა მემკვიდრე. მე იმ დროს საზღვარგარეთ ვიმყოფებოდი და მხოლოდ ოთხი წლის შემდეგ შევიტყვე ამის შესახებ,“ - ყვება ქალი.

როგორც ადვოკატი ნათია ნაკაშიძე განმარტავს, მემკვიდრეობის მიღების თაობაზე განცხადება ნოტარიუსს უნდა წარედგინოს გარდაცვალებიდან 6 თვის ვადაში.

ეს ვადა ორივე შვილს: როგორც ძმას, ისე დას ჰქონდათ. მიმართვა შეიძლებოდა პირადად ან მინდობილობის საფუძველზე წარმომადგენლის მეშვეობითაც.

„თუ ამ ვადაში მემკვიდრე არ მიმართავს ნოტარიუსს, ის ავტომატურად კარგავს სამართლებრივ შესაძლებლობას მემკვიდრეობის მიღებაზე, გარდა იმ შემთხვევისა, როცა დაადასტურებს, რომ ფაქტობრივად დაეუფლა მემკვიდრეობით ქონებას,“ - განმარტავს ადვოკატი ნათია ნაკაშიძე .

ნოტარიუსი ვალდებულია, გაითვალისწინოს ყველა შესაძლო მემკვიდრე, რომელიც კანონით უფლებამოსილია.
თუმცა, როგორც ნათია ნაკაშიძე აღნიშნავს, თუ მემკვიდრემ (ძმამ) დამალა თქვენი არსებობა, ნოტარიუსს შესაძლოა არ ჰქონოდა ინფორმაცია სხვა შვილზე და მხოლოდ იმაზე დაყრდნობით გაუფორმებია ქონება, ვინც მიმართა.

ამიტომ მნიშვნელოვანია, რომ ნოტარიუსთან თქვენი მონაცემები ფიქსირდებოდეს როგორც მემკვიდრისა.

თუ მამის გარდაცვალებიდან უკვე 4 წელია გასული და ქონება ძმის სახელზეა გაფორმებული, ეს არ ნიშნავს, რომ ყველაფერი დასრულდა. შეიძლება მიმართო სასამართლოს იმ მოტივით, რომ შენ მემკვიდრედ არ გცნეს და შენი უფლება დაირღვა.

ამისათვის საჭიროა:

1. მოიპოვო მამის მემკვიდრეობის დამადასტურებელი დოკუმენტები (მშობლის დაბადების მოწმობა, შენს შვილობაზე მტკიცებულება).

2. წარადგინო სარჩელი სამოქალაქო სასამართლოში მემკვიდრეობითი უფლების აღდგენის შესახებ.

3. დაადასტურო, რომ შენ მამის ქონებაზე უფლებას ვერ ახორციელებდი ობიექტური მიზეზით (მაგალითად, საზღვარგარეთ იმყოფებოდი).

„თუ სასამართლო დაადგენს, რომ შენი უფლებები დაირღვა, შესაძლებელია ქონების ნაწილის დაბრუნება ან შესაბამისი კომპენსაციის მოთხოვნა,“ - ამბობს ადვოკატი ნათია ნაკაშიძე

მემკვიდრეობითი დავები ხშირად რთულია და საჭიროებს არა მხოლოდ ემოციურ სიმტკიცეს, არამედ სამართლებრივ სიზუსტესაც. თუ გაქვს განცდა, რომ შენი უფლება დაირღვა, ნუ შეეგუები - სამართალი შენ მხარესაა, მთავარია, იმოქმედო დროულად და იურიდიულად სწორად.

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები