მამას ჰქონდა სესხი და გარდაიცვალა - რა ხდება ვალის გადახდასთან დაკავშირებით? ადვოკატი ნათია ნაკაშიძე განმარტავს

ადამიანის გარდაცვალება, სამწუხაროდ, ხშირად არამარტო ემოციურ, არამედ ფინანსურ გამოწვევებსაც ტოვებს უკან. ერთ-ერთი ყველაზე ხშირი შემთხვევაა, როდესაც გარდაცვლილ პირს ჰქონდა ბანკის სესხი ან სხვა ვალდებულება და ოჯახს არ აქვს ინფორმაცია, ვრცელდება თუ არა ეს ვალი მათზე.

ადვოკატი ნათია ნაკაშიძე, რომელიც სპეციალიზებულია ადმინისტრაციულ, სამოქალაქო და ბავშვთა უფლებებში, განმარტავს: „ვალდებულება შეიძლება გადავიდეს მხოლოდ იმ შემთხვევაში, თუ მემკვიდრემ მიიღო მემკვიდრეობა - ანუ გარდაცვლილის ქონება. კანონით, მემკვიდრე ვალდებულია გადაიხადოს მხოლოდ იმ ოდენობის ვალი, რაც მემკვიდრეობით მიღებული ქონების ღირებულებას არ აღემატება.“

თუ გარდაცვლილს ჰქონდა ბანკის სესხი, პირველ რიგში უნდა განისაზღვროს, იყო თუ არა ქონება, რომელიც შეიძლება მემკვიდრეობად გადმოსულიყო.

• თუ ქონება არ არსებობს, ან მემკვიდრეობა არ მიღებულა, ბანკს არ აქვს უფლება მოითხოვოს თანხის გადახდა ოჯახის წევრებისგან.

• თუ დედა ან სხვა ნათესავი არ იყო თავდები, იგი სამართლებრივად ვალდებული არ არის გადაიხადოს ვალი.

ნათია ნაკაშიძე ხაზგასმით აღნიშნავს: „თუ ბანკი აგრძელებს თანხის ჩამოჭრას, დიდი ალბათობით საქმე უკვე აღსრულების ეროვნულ ბიუროშია გადაცემული. ამ დროს მნიშვნელოვანია გადაამოწმოთ, არსებობს თუ არა სასამართლო გადაწყვეტილება ან აღსრულების დოკუმენტი, რომელიც ფინბიუროს მიერ გამოიყენება.“

„მნიშვნელოვანია, რომ ოჯახმა დროულად იმოქმედოს. არ უნდა მოხდეს ბრმად თანხის გადახდა ან ფინბიუროსთან შეთანხმება ისე, რომ არ იყოს გარკვეული სამართლებრივი საფუძველი. ყველა მოქმედება უნდა იყოს დოკუმენტურად დადასტურებული,“ – აღნიშნავს ნათია ნაკაშიძე.

გარდაცვლილი პირის ვალები შეიძლება გახდეს ოჯახისათვის სტრესის წყარო, თუმცა კანონი მკაფიოდ განსაზღვრავს პასუხისმგებლობის საზღვრებს. თუ მემკვიდრეობა არ მიღებულა ან ქონება არ არსებობს - ბანკს ან ფინბიუროს არ აქვს უფლება მოითხოვოს გადახდა.