'' წყნარად ისხედით გაკვეთილის დასრულებამდე ''

ქალბატონო ნინო წლებია ამზადებთ მოსწავლებს ეროვნული, სამაგისტრო და პედაგოგთა გამოცდებისთვის. რას გვეტყვით ერთიანი ეროვნული გამოცდების ფორმატზე?

ეროვნულების ფორმატი ძალიან მომწონს, მაგრამ რაც ეს გამოცდები დაწესდა მას შემდეგ პროგრამა არ შეცვლილა. მისი გადახედვა თავში არავის მოსდის...

- შეგიძლიათ უფრო დაგვიკონკრეტოთ?

მაგალითად, ალ. ჭავჭავაძის მხოლოდ "გოგჩა" ტრიალებს წლებია. პროგრამში შესულია სულხან-საბა ორბელიანის " სიბრძნე სიცრუისა" -დან 5 იგავი და 2005 წლიდან ეს იგავები არ შეცვლილა, მაშინ როდესაც უამრავ იგავს სწავლობს აბიტურიენტი სკოლაში. მეტსაც გეტყვით, ისეთი იგავია შეტანილი, რომელიც არასდროს მოვა გამოცდაზე -"უგუნური მცურავი" - ორი წინადადებაა... არის ასეთი ლექსებიც.

-შეგიძლიათ დაგვისახელოთ?

ანა კალანდაძის " მკვდართა მზე ვარ" იმდენად მცირე მოცულობისაა ვერავინ მოითხოვს მისი დახმარებით 35 ქულიანი თემის აგებას...

- რა სირთულეებს აწყდებით სწავლებისას?

გრამატიკის დეტალურ ცოდნას მოითხოვს გამოცდა (მაღალი ქულის ასაღებად თორე ლოგიკურ- მექანიკურად რაღაცას დაწერ)... ამ დროს როგორ ისწავლება გრამატიკა სკოლაში ყველამ ვიცით! ერთი რვეულია მისთვის გამოყოფილი, რომელიც უნდა შეავსო ხოლმე. ცალკე საგნად ქართული ენა აღარ ისწავლება და შედეგიც სახეზეა- ყველაფერს ვიწყებთ ნულიდან. მადლობა იმ პედაგოგოებს, რომლებმაც გრამატიკისთვის ცალკე დღეები გამოყვეს, თუმცა ვალდებულნი არ არიან..

- რას გვეტყვით ქართულის გამოცდაზე შესულ სიახლეებზე?

აბიტურიენტების დიდ ნაწილს უჭირს ამ ნაწილში უმაღლესი შეფასების აღება და რაც მთავარია ვერ წერენ ფრაზით " ჰე მიდი დაწერე". მიუხედავად იმისა ,რომ აბიტურიენტის აზრი აინტერესებთ და არგუმენტაცია, რომელსაც წესით არანაირი სტრუქტურა არ უნდა სჭირდებოდეს ვხედავთ იმას, რომ მოსწავლეებს უჭირთ აზრის ჩამოყალიბება , თემის აგება, დასაბუთება ტექტიდან თუ თანამედროვეობიდან.

-რას ურჩევთ მომავალ აბიტურიენტებს?

გამოცდებისთვის მომზადება დაიწყეთ კრიტერიუმების გაცნობით- აუცილებელია იცოდეთ რას ითხოვენ თქვენგან... მოძებნეთ პროგრამა,ამობეჭდეთ და პერიოდულად გადახედეთ... იკითხეთ ინფორმაციები მსოფლიოსა თუ საქართველოში მიმდინარე მოვლენებზე. სპორტსა თუ ხელოვნებაზე, პოლიტიკასა თუ საზოგადოებაზე- ამის გარეშე ვერ დაასაბუთებთ თემის მეორე ნაწილს. შეხედეთ კრიტიკულად პედაგოგის ახნილ პრობლემატიკას თუ გააზრებას, მოიძიეთ ინტერნეტ სივრცში იგივე თემები - შეადარეთ. იმსჯელეთ კლასში.

და ბოლოს არ შეეგუოთ ფრაზას: "წყნარად ისხედით გაკვეთილის დასრულებამდე", რადგან აქედან იწყება გაუაზრებლობა შენი მოვალეობების. შენი საქმის კარგად კეთებაა ერთადერთი გამოსავალი, ერთადერთი გზა უკეთესობისკენ შეცვალო არა მარტო შენი, არამედ ქვეყნის ცხოვრება და მომავალი. ფრაზა-" წყნარად ისხედით გაკვეთილის დასრულებამდე" დღევანდელი მახინჯი განათლების სისტემის ტრაგიკული სახეა.