საქართველო შეუერთდა UNIDROIT-ის კონვენციასა და ოქმს საავიაციო ობიექტებზე საერთაშორისო გარანტიების შესახებ

იტალიის რესპუბლიკაში საქართველოს საგანგებო და სრულუფლებიანმა ელჩმა, გაეროს რომში განთავსებულ სპეციალიზებულ ორგანიზაციებში (FAO, IFAD, WFP) მუდმივმა წარმომადგენელმა თამარ ლილუაშვილმა, კერძო სამართლის უნიფიკაციის საერთაშორისო ინსტიტუტის (UNIDROIT) გენერალურ მდივანს, პროფესორ იგნასიო ტირადოს გადასცა სიგელი, რომლის საფუძველზეც საქართველო ოფიციალურად შეუერთდა „საავიაციო ობიექტებთან დაკავშირებით მოძრავი მოწყობილობების მიმართ საერთაშორისო გარანტიების შესახებ“ კონვენციასა და მის შესაბამის ოქმს.

აღნიშნული აქტით, საქართველომ განამტკიცა თავისი საერთაშორისო ვალდებულებები და დაადასტურა მზადყოფნა, სრულფასოვნად ჩაერთოს საერთაშორისო კერძო სამართლის სფეროში მოქმედ სამართლებრივ რეჟიმებში.

საქართველოს მიერ კონვენციის რატიფიცირება და მის ოქმთან მიერთება წარმოადგენს ქვეყნის მხრიდან აღიარებას, რომ საერთაშორისო სამართლის ფარგლებში საავიაციო სექტორში მოქმედი გარანტიების დაცვა არის სახელმწიფო ინტერესის ნაწილი. აღნიშნული ნაბიჯი ზრდის სამართლებრივი გარემოს პროგნოზირებადობასა და სტაბილურობას, რაც პირდაპირ უწყობს ხელს როგორც საერთაშორისო სავაჭრო ურთიერთობების, ისე საინვესტიციო პროცესების გაძლიერებას.

ოფიციალური ცერემონიის შემდგომ გამართულ სამუშაო შეხვედრაზე მხარეებმა განიხილეს თანამშრომლობის გაგრძელებისა და გაღრმავების შესაძლებლობები. საქართველოსა და UNIDROIT-ის შორის თანამშრომლობა, განსაკუთრებული ყურადღებით, მიმართული იქნება სამართლებრივი ინსტრუმენტების ჰარმონიზაციისკენ, კერძო სამართლის სფეროში ინოვაციური პრაქტიკების დანერგვისკენ და საერთაშორისო სამართლებრივი ჩარჩოების ეფექტიანი გამოყენების ხელშეწყობისკენ.

კონსულტაციისთვის დაგვიკავშირდით