ქონების გადასახადის გადახდა 15 ნოემბრამდე - ვის ეხება და რა უნდა იცოდეთ

2024 წლის შემოსავლებზე დაყრდნობით, იმ მოქალაქეებს, რომელთა ოჯახური შემოსავალი 40 000 ლარს აღემატება და ფლობენ ქონებას, 15 ნოემბრამდე უწევთ ქონების გადასახადის გადახდა.

ადვოკატი ნათია ნაკაშიძე, რომელიც სპეციალიზებულია ადმინისტრაციულ, სამოქალაქო საქმეებსა და ბავშვთა უფლებებში, დეტალურად განმარტავს ვის ეხება ეს ვალდებულება, როგორ უნდა მოხდეს დეკლარაციის შევსება და რა სანქციებია დარღვევის შემთხვევაში.

მიუხედავად იმისა, რომ ბევრს ჰგონია, ქონების გადასახადი მხოლოდ ბიზნესზე ვრცელდება, სინამდვილეში ეს ფიზიკური პირების ვალდებულებაცაა. „ბევრ მოქალაქეს ჰგონია, რომ რადგან საშემოსავლო გადასახადს დამსაქმებელი იხდით, სხვა გადასახადები არ ეხებათ. მაგრამ ქონების გადასახადი სწორედ ფიზიკურ პირებსაც ეხებათ, მათ შორის ინდმეწარმეებს,“ - განმარტავს ნათია ნაკაშიძე.

რა ვადებია გასათვალისწინებელი?

1 ნოემბრამდე - საჭიროა ქონების დეკლარაციის შევსება შემოსავლების სამსახურის ვებგვერდზე;

15 ნოემბრამდე - ქონების გადასახადის გადახდა;

თუ თქვენი შემოსავალი არ აღემატება 40 000 ლარს, დეკლარაციის შევსება მაინც აუცილებელია, რათა სისტემა წინა წლის მონაცემებით არ იხელმძღვანელოს და ავტომატურად არ დაგარიცხოთ გადასახადი.

როგორ განისაზღვრება გადასახადის ოდენობა?

გადასახადის განაკვეთი დამოკიდებულია როგორც შემოსავალზე, ისე ქონების ღირებულებასა და მდებარეობაზე:

წლიური შემოსავალი	განაკვეთი
₾40,000 – ₾100,000	0.05% – 0.2%
₾100,000+	0.8% – 1%

„გადასახადის ოდენობა ითვლება ჯამურ შემოსავალზე, მათ შორის საშემოსავლო გადასახადის ჩათვლით და არა მხოლოდ ხელზე მიღებულ თანხაზე,“ - განმარტავს ადვოკატი.

თუ ქონება არის ავტომობილი? ამ შემთხვევაში გადასახადის ოდენობა დამოკიდებულია:

• ავტომობილის გამოშვების წელსა და

• ტექნიკურ მონაცემებზე

შემოსავლების სამსახურის პლატფორმა ავტომატურად ითვლის გადასახადის ოდენობას, რაც მოქალაქეს ამარტივებს პროცესს.

რა სანქციებია დაგვიანებისას?

თუ დეკლარაციას არ შეავსებთ 1 ნოემბრამდე ან გადასახადს არ გადაიხდით 15 ნოემბრამდე, დაგეკისრებათ:

• ჯარიმა დეკლარაციის დაგვიანებისთვის;

• საურავი ყოველი გადაცილებული დღის განმავლობაში;

„ჯარიმა და საურავი ავტომატურად გერიცხებათ, ამიტომ მნიშვნელოვანია, რომ ვადები არ გამოგეპაროთ,“ - აღნიშნავს ნათია ნაკაშიძე.

დეკლარაციაში აუცილბელად უნდა მივუთოთო ქონების ღირებულება?

დიახ.
დეკლარაციაში ქონების ღირებულების მითითება სავალდებულოა, თუმცა ფიზიკურ პირებს არ სჭირდებათ ქონების შემფასებლის ან აუდიტორის მომსახურება - შეგიძლიათ მიუთითოთ ინდივიდუალურად შეფასებული ღირებულება.

ქონების გადასახადი არ არის მხოლოდ ბიუროკრატიული ვალდებულება - ეს არის ფინანსური პასუხისმგებლობა, რომელიც თითოეულ მოქალაქეს ეხება. დაიცავით ვადები, შეავსეთ დეკლარაცია და გადაუხადეთ ბიუჯეტს დროულად, რათა თავიდან აიცილოთ ჯარიმები და ზედმეტი ხარჯები.