ფეისბუქზე გინება დანაშაულია? - ადვოკატი ნათია ნაკაშიძე განმარტავს

სოციალური ქსელები, განსაკუთრებით ფეისბუქი, დღეს უკვე იქცა პლატფორმად, სადაც ადამიანები თავისუფლად აზიარებენ საკუთარ მოსაზრებებს. თუმცა, ხშირად ეს „თავისუფლება“ გადადის ზღვარს და იწვევს სამართლებრივ კითხვებს.

ამჯერად ადმინისტრაციულ, სამოქალაქო და ბავშვთა უფლებებში სპეციალიზებული ადვოკატი ნათია ნაკაშიძე განმარტავს:  რა ხდება იმ შემთხვევაში, როცა ფეისბუქზე გინებით გამოხატული ემოცია შესაძლოა სამართლებრივად შეფასდეს.

შეკითხვა: ფეიქბუქზე ვაგინე ერთ ტიპს, მაგრამ პირადად არც მიმიწერია და არც მომითაგავს. გავიდა რამდენიმე დღე და რეკავს ვიღაც, ამბობს, პოლიციიდან ვარო და მემუქრება, რომ საქმე აღიძვრება. . მაინტერესებს - თუ გინება საკუთარი ფეისბუქის გვერდზე თავისუფალი აზრის გამოხატვაა, შეუძლია ვინმეს ამ კომენტარზე საჩივარი შეიტანოს?

პირველ რიგში, უნდა განვასხვავოთ „სიტყვის თავისუფლება“ და „სიტყვიერი შეურაცხყოფა“ - ეს ორი ცნება ერთმანეთის ტოლფასი არ არის.

გინება არ არის აზრის გამოხატვა, ადვოკატი ნათია ნაკაშიძე განმარტავს: „გინება, როგორც სიტყვიერი შეურაცხყოფა, არ მიეკუთვნება აზრის თავისუფალ გამოხატვას. თუმცა, იგი არც მუქარად ჩაითვლება, რადგან სისხლის სამართლის კოდექსის 151-ე მუხლი ეხება მხოლოდ ისეთ შემთხვევებს, როცა არსებობს სიცოცხლის მოსპობის, ჯანმრთელობის დაზიანების ან ქონების განადგურების რეალური მუქარა - და დაზარალებულს უჩნდება საფუძვლიანი შიში, რომ მუქარა შესრულდება.“

მოკლედ რომ ვთქვათ - გინება შეიძლება აღიქმებოდეს შეურაცხმყოფელ ქცევად, მაგრამ სისხლის სამართლის დანაშაული არაა, თუ ტექსტი არ შეიცავს რეალურ მუქარას ან იძულების ნიშნებს.

შეუძლია თუ არა ვინმეს საჩივრის შეტანა ამ მოტივით? საჩივრის შეტანა თეორიულად ნებისმიერ ადამიანს შეუძლია, თუმცა ეს არ ნიშნავს, რომ მას სამართლებრივი შედეგი მოჰყვება.

ნათია ნაკაშიძე განმარტავს:„საჩივარი შეიძლება წარადგინოს ნებისმიერ პირმა, მაგრამ საგამოძიებო ორგანო ვალდებულია შეაფასოს, შეიცავს თუ არა მოცემული ქმედება სისხლის სამართლის ნიშნებს. თუ საქმე მხოლოდ სიტყვიერ შეურაცხყოფას ეხება, საქმე არ აღიძვრება.“

გინება, მიუხედავად იმისა, რომ ეთიკურად მიუღებელია, არ არის მუქარა და შესაბამისად, არ წარმოადგენს სისხლის სამართლის დანაშაულს 151-ე მუხლის ფარგლებში. თუმცა, ასეთი კომენტარები შესაძლოა შეფასდეს როგორც სიტყვიერი შეურაცხყოფა, რაც მორალურ ან რეპუტაციულ ზიანზე შეიძლება გავლენას ახდენდეს.

ამიტომ, რეკომენდებულია სოციალურ ქსელებში საკუთარი აზრის გამოხატვისას თავი აარიდოთ შეურაცხმყოფელ ფორმულირებებს, რათა არ შექმნათ სამართლებრივი გაუგებრობები ან რეპუტაციული რისკები.

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები