რას გულისხმობს მხარეთა მორიგება?

მორიგება მხარეთა შეთანხმებაა, რომლითაც განისაზღვრება მორიგების პირობები და წყდება წარმოება. მორიგების პირობები არ შეიძლება იყოს კანონსაწინააღმდეგო.

სასამართლოში სამოქალაქო და ადმინისტრაციული დავის განხილვისას მხარეებს გააჩნიათ უფლება, რომ საქმე მორიგებით დაასრულონ. მორიგების მისაღწევად მოსარჩელე სასარჩელო განცხადებაში ჩამოყალიბებულ მოთხოვნას ან ამცირებს ან კიდევ სხვა მოთხოვნით ცვლის, რასაც ეთანხმება მოპასუხეც.

საქმის მორიგებით დამთავრების ინიციატორი შეიძლება იყვნენ მხარეები და თვით სასამართლოც. მორიგების შემთხვევაში საქმეზე მიღებული ყველა გადაწყვეტილება და განჩინება უქმდება და საქმისწარმოება წყდება, სასამართლოსათვის ხელმეორედ მიმართვა იმავე მხარეებს შორის, იმავე საგანზე და იმავე საფუძვლით, არ შეიძლება. მორიგებისას იძულებითი აღსრულების ისეთივე წესი მოქმედებს, როგორიც კანონიერ ძალაში შესული სასამართლო გადაწყვეტილების მიმართ.

მოსარჩელეს უფლება მოითხოვოს მის სასარგებლოდ გამოტანილი სასამართლო გადაწყვეტილების აღსრულება, არ წარმოექმნება მანამ, სანამ არ გამოვა სამივე ინსტანციის სასამართლოს გადაწყვეტილება ან არ ამოიწურება გასაჩივრების ვადები. სამივე ინსტანციაში დავის განხილვა შეიძლება რამდენიმე წელიც გაგრძელდეს. ასევე, შეიძლება მოსარჩელის სასარგებლოდ გამოტანილი გადაწყვეტილების იძულებითი წესით აღსრულებაც გაჭიანურდეს იმის გამო, რომ აღსრულების მომენტისათვის მოპასუხეს არ ჰქონდეს საკმარისი ქონება.

თუ მხარეები მორიგდებიან სასამართლოს მთავარი სხდომის ჩატარებამდე, ისინი მთლიანად თავისუფლდებიან სახელმწიფო ბაჟის გადახდისაგან, ხოლო თუ მხარეები მორიგდებიან სასამართლოს მთავარ სხდომაზე, მაშინ სახელმწიფო ბაჟის ოდენობა ნახევრდება.

დამატებითი ინფორმაციის მიღების მიზნით დაუკავშირდით საერთაშორისო საადვოკატო კომპანია ,,ნაკაშიძე&პარტნიორები/ Law Office Nakashidze&Partners''-ს.

ვუზრუნველვყობთ თქვენს დაცვას/წარმომადგენლობას: საქართველოსა და იტალიაში ყველა ინსტანციის სასამართლოში; ადმინისტრაციულ ორგანოებში,საელჩო,საკონსულო,იუსტიციის სახლში და სამინისტროებში; სამართლებრივი ურთიერთობის რეგულირებას ფიზიკურ და იურიდიულ პირებთან;სტრასბურგის-ადამიანის უფლებათა ევროპულ სასამართლოში.