მშენებლობის ნებართვა, სამართლებრივი დავა, სარჩელის უზრუნველყოფა, საჯარო რეესტრი

სამართლებრივი საკითხები ყოველდღიურ ცხოვრებაში ხშირად იჩენს თავს იქნება ეს მეზობლებს შორის ქონებრივი დავა, მემკვიდრეობითი საკითხი თუ კომპანიის მიერ მომხმარებლის უფლებების დარღვევა. ასეთ დროს გამოცდილი ადვოკატის რჩევა შესაძლოა გადამწყვეტი აღმოჩნდეს. აღნიშნულ საკითხთან დაკავშრებით ისაუბრებს სამოქალაქო და ბავშვთა უფლებებში ლიცენზირებული ადვოკატი ნათია ნაკაშიძე

კითხვა: ძმებთან ქონებრივი დაყოფის შემდეგ საერთო კიბე აღმოჩნდა ძმის ფართში. აუცილებელია თუ არა ნებართვა კიბის დასამონტაჟებლად და ვის უნდა მივმართო?

პასუხი: კიბის მოწყობა, როგორც მშენებლობის ელემენტი, საჭიროებს მშენებლობის მარტივ ნებართვას, რომლის გაცემასაც უზრუნველყოფს თქვენი საცხოვრებელი ადგილის თვითმმართველი ერთეული (მერია ან გამგეობა). განაცხადს თან უნდა დაერთოს:

• საკუთრების დამადასტურებელი დოკუმენტი მიწის ნაკვეთზე ან შენობაზე;

• არქიტექტურული ესკიზი;

• საჭიროების შემთხვევაში საპროექტო კვლევის შედეგები.

ეს პროცედურა აუცილებელია იმისათვის, რომ თქვენს მიერ განხორციელებული ცვლილება სამართლებრივად დაცული და კანონიერად სწორი იყოს.

კითხვა: შესაძლებელია თუ არა 1965-70 წლებში მიტოვებული მიწის რეგისტრაცია, სადაც ადრე 1918 წელს აშენებული სახლი იდგა, თუმცა ახლა აღარ არსებობს? ხელთ მაქვს 1958-66 წლების საკომლო ამონაწერი.

პასუხი: თუ თქვენ ბრძანდებით აღნიშნული მიწის მემკვიდრე და სამკვიდრო ოფიციალურად მიგიღიათ, მაშინ შესაძლებელია მიწის რეგისტრაცია საკუთრებაში არსებული დოკუმენტების საფუძველზე. საკომლო ამონაწერი, როგორც მტკიცებულება, გამოიყენება საჯარო რეესტრში რეგისტრაციის პროცესში. მნიშვნელოვანია, რომ განაცხადი სრულად იყოს შედგენილი, რათა რეესტრმა თქვენი საკუთრების უფლება დაადასტუროს.

კითხვა: სამშენებლო კომპანიამ დამაზარალა - თანხა არ დამიბრუნა და ვერც ქირაობის ვალდებულება შეასრულა. როგორ გავიგო, არსებობს თუ არა კომპანიის სახელზე ქონება და შემიძლია თუ არა მისი დაყადაღება სარჩელამდე?

პასუხი:კომპანიის საკუთრებაში არსებული ქონების შესახებ ინფორმაცია შეგიძლიათ გადაამოწმოთ საჯარო რეესტრში კომპანიის იდენტიფიკატორის საშუალებით. ასევე შესაძლებელია სრული ცნობის მიღება კომპანიის სახელზე რეგისტრირებული ქონების ჩამონათვალით.

სასამართლოში სარჩელის შეტანისას, ან სარჩელამდე, შეგიძლიათ მოითხოვოთ სარჩელის უზრუნველყოფა. ეს გულისხმობს კომპანიის ქონების დაყადაღებას, რათა შემდგომში სასამართლო გადაწყვეტილების აღსრულება არ გახდეს შეუძლებელი.

შესაბამისი განცხადება უნდა იყოს დასაბუთებული და შეიცავდეს გარემოებებს, რომლებიც მიუთითებს:

• გადაწყვეტილების აღსრულების სირთულეზე ან შეუძლებლობაზე;

• იმ ზიანზე, რომელიც შეიძლება წარმოშობდეს, თუ ქონება განკარგულებაში აღმოჩნდება.

პროცედურისთვის საჭიროა სახელმწიფო ბაჟის გადახდა – 50 ლარი.