როდის შეუძლია უცხოელს საკუთრების შეძენა სასოფლო-სამეურნეო დანიშნულების მიწაზე

კანონით განსაზღვრულია იმ სუბიექტების ამომწურავი ჩამონათვალი, რომლებსაც შეუძლიათ საკუთრების უფლებას ფლობდნენ საქართველოს ტერიტორიაზე მდებარე სასოფლო-სამეურნეო დანიშნულების მიწაზე, კერძოდ, კანონის მე-4 მუხლის 1-ლი ნაწილის თანახმად, სასოფლო-სამეურნეო მიწის ნაკვეთი შეიძლება იყოს მხოლოდ შემდეგ სუბიექტთა საკუთრებაში:

• საქართველოს მოქალაქე;
• საქართველოს სახელმწიფო, ავტონომიური რესპუბლიკა, მუნიციპალიტეტი;
• საქართველოს საჯარო სამართლის იურიდიული პირი (კანონით გათვალისწინებულ შემთხვევაში);
• საქართველოში რეგისტრირებული კერძო სამართლის იურიდიული პირი;
• არარეგისტრირებული ორგანიზაციული წარმონაქმნი, თუ მისი წევრების უმრავლესობას შეადგენენ ზემოჩამოთვლილი სუბიექტები, რომლებსაც აქვთ პრაქტიკული შესაძლებლობა, გადამწყვეტი ზეგავლენა მოახდინონ სასოფლო-სამეურნეო დანიშნულების მიწასთან დაკავშირებით ორგანიზაციული წარმონაქმნის გადაწყვეტილებაზე.

სასოფლო-სამეურნეო დანიშნულების მიწა შეიძლება იყოს საკუთრებაში :

• საქართველოს მოქალაქეობის არმქონე ფიზიკური პირისა, თუ მან ეს ქონება მიიღო მემკვიდრეობით;
• საქართველოში რეგისტრირებული იმ კერძო სამართლის იურიდიული პირის საკუთრებაში, რომელიც არ აკმაყოფილებს კანონის მე-4 მუხლის 1-ლი ნაწილის დ) ქვეპუნქტის კრიტერიუმებს – საინვესტიციო გეგმის საფუძველზე საქართველოს მთავრობის გადაწყვეტილებით.

დაუშვებელია ნაკვეთის უზრუნველყოფის საშუალებად გამოყენება მისი კრედიტორის საკუთრებაში გადასვლის პირობით შემდეგ სუბიექტთა სასარგებლოდ: უცხოელი, საზღვარგარეთ რეგისტრირებული იურიდიული პირი ან საქართველოში რეგისტრირებული კერძო სამართლის იურიდიული პირი, რომლის პარტნიორია უცხოელი/საზღვარგარეთ რეგისტრირებული იურიდიული პირი.აგრეთვე დაუშვებელია ზემოჩამოთვლილ სუბიექტთათვის ისეთი მოთხოვნის/უფლების დათმობა, რომელიც ითვალისწინებს სასოფლო-სამეურნეო დანიშნულების მიწაზე საკუთრების უფლების წარმოშობას.

თუ საქართველოში რეგისტრირებულ კერძო სამართლის იურიდიული პირს საკუთრებაში აქვს სასოფლო-სამეურნეო დანიშნულების მიწის ნაკვეთი, დაუშვებელია ამ პირის მმართველობის იმგვარი ცვლილება, რომლის შედეგადაც მისი დომინანტი პარტნიორი გახდება უცხოელი ფიზიკური ან იურიდიული პირი. ასევე დაუშვებელია საქართველოში რეგისტრირებული კერძო სამართლის იურიდიული პირის წილის/აქციის/პაის დაგირავება მისი კრედიტორის საკუთრებაში გადასვლის პირობით უცხოელი ფიზიკური ან იურიდიული პირის (მოგირავნე) სასარგებლოდ, თუ გირავნობის საგნის მოგირავნის საკუთრებაში გადასვლის შემთხვევაში ეს უკანასკნელი გახდება მიწის ნაკვეთის მესაკუთრე იურიდიული პირის დომინანტი პარტნიორი.

კანონის მოქმედების რეჟიმში არ ექცევა ისეთი სასოფლო-სამეურნეო დანიშნულების მიწის ნაკვეთები, რომლებზეც კანონის ამოქმედების მომენტისთვის რეგისტრირებულია უცხოელი ფიზიკური ან იურიდიული პირის (გარდა საზღვარგარეთ რეგისტრირებული იურიდიული პირისა) საკუთრების უფლება ან არსებობს უფლების რეგისტრაციის სამართლებრივი საფუძველი („უფლების დამდგენი დოკუმენტი“).

კანონით უცხოელისათვის განსაზღვრული ვალდებულებები არ ვრცელდება სასოფლო-სამეურნეო მიწის მესაკუთრე იმ ფიზიკურ პირებზე, რომლებსაც საქართველოს მოქალაქეობა შეუწყდათ კანონის ამოქმედების შემდეგ.

დამატებითი ინფორმაციის მიღების მიზნით დაუკავშირდით საერთაშორისო საადვოკატო კომპანია ,,ნაკაშიძე&პარტნიორები/ Law Office Nakashidze&Partners''-ს.

ვუზრუნველვყობთ თქვენს დაცვას/წარმომადგენლობას: საქართველოსა და იტალიაში ყველა ინსტანციის სასამართლოში; ადმინისტრაციულ ორგანოებში,საელჩო,საკონსულო,იუსტიციის სახლში და სამინისტროებში; სამართლებრივი ურთიერთობის რეგულირებას ფიზიკურ და იურიდიულ პირებთან;სტრასბურგის-ადამიანის უფლებათა ევროპულ სასამართლოში.