პარლამენტი 29 ოქტომბერს, ინტერპელაციის წესით, ინფრასტრუქტურის მინისტრს მოუსმენს

პარლამენტი 29 ოქტომბერს, ინტერპელაციის წესით, ინფრასტრუქტურის მინისტრს, რევაზ სოხაძეს მოუსმენს. როგორც ბიუროს სხდომაზე, პარლამენტის თავმჯდომარემ შალვა პაპუაშვილმა განაცხადა, ფრაქცია „ქართულმა ოცნებამ“ ინტერპელაციის წესით მიმართა საქართველოს ინფრასტრუქტურის მინისტრს და საკითხები უკვე გადაგზავნილია მინისტრთან.

შალვა პაპუაშვილმა პარლამენტის ახალი რეგლამენტით გათვალისწინებული ინტერპელაციის წესი განმარტა.

„ინტერპელაციის ახალი წესი კიდევ უფრო აქტიური და მოქნილი საშუალებაა იმისთვის, რომ მინისტრთან გაიგზავნოს კითხვები. ახალი წესის თანახმად, წინასწარ ხდება კითხვების გაგზავნა, რომლის რაოდენობა შეზღუდული არ არის. მინისტრი, წინასწარ გაგზავნილ კითხვებზე, ინტერპელაციის ფარგლებში, პასუხს გასცემს პარლამენტის პლენარულ სხდომაზე. ეს პროცესი მაქსიმუმ სამი საათით არის შემოფარგლული. ასე რომ, პირველად გვექნება პარლამენტის რეგლამენტით გათვალისწინებული ახალი წესით ინტერპელაცია და ვფიქრობ, საინტერესო იქნება როგორც პარლამენტის წევრებისთვის, ისე ჩვენი მოქალაქეებისთვის“, - განაცხადა შალვა პაპუაშვილმა.

მიმდინარე კვირას პარლამენტის პლენარული სხდომები 28 და 29 ოქტომბერს გაიმართება.

პარლამენტის თავმჯდომარე პარტია „გახარია საქართველოსთვის“ დეპუტატების საპარლამენტო საქმიანობის დაწყებას გამოეხმაურა და აღნიშნა, რომ მათ საპარლამენტო საქმიანობისთვის ყველა პირობა ექნებათ.

„გასულ კვირას ჩვენ მოვისმინეთ პარტიის „გახარია საქართველოსთვის“ განცხადება იმის თაობაზე, რომ აპირებენ საკუთარი მანდატები, რომელიც დღესაც აქვთ, აქტიურად გამოიყენონ და აღარ გააცდინონ საპარლამენტო საქმიანობა. მათ რთული გზა გამოიარეს. ვნახოთ, როგორ ჩაეწერებიან საპარლამენტო საქმიანობაში. მათ ექნებათ რეგლამენტით გათვალისწინებული ყველა ინსტრუმენტის გამოყენების შესაძლებლობა, რაც პარლამენტის წევრებს გააჩნიათ. ისინი უზრუნველყოფილი იქნებიან იმისთვის, რომ სამუშაო გარემო ჰქონდეთ“, - განაცხადა პაპუაშვილმა.

პარლამენტის ბიურომ მიმდინარე კვირის პლენარული სხდომების დღის წესრიგი განსაზღვრა და ახალ საკანონმდებლო ინიციატივებზე იმსჯელა.

კონსულტაციისთვის დაგვიკავშირდით