იურიდიულ საკითხთა კომიტეტმა „საქართველოს საარჩევნო კოდექსში“ და „მოქალაქეთა პოლიტიკური გაერთიანებების შესახებ“ ორგანულ კანონებში შესატანი ცვლილებები განიხილა

იურიდიულ საკითხთა კომიტეტმა მეორე მოსმენისთვის განიხილა „საქართველოს საარჩევნო კოდექსში“ და „მოქალაქეთა პოლიტიკური გაერთიანებების შესახებ“ ორგანულ კანონებში შესატანი ცვლილებები.

სამუშაო ჯგუფის ფორმატში მოხდა ვენეციის კომისიისა და ეუთო/ODIHR-ის ერთობლივი წინასწარი დასკვნის განხილვა, მთელ რიგ საკითხებზე პოზიციების შეჯერება და შესაბამისად, პირველი მოსმენით მიღებულ კანონპროექტებში შესატანი ცვლილები მომზადდა.

კანონპროექტებში შემდეგი ცვლილებები შევა:

• პირველი სხდომის ჩატარება ანუ კომისიის უფლებამოსილების ცნობა იმპერატიულად არჩევნებამდე 30-ე დღეს განხორციელდება;
• ელექტრონული საშუალებების გამოყენებით არჩევნების ჩატარებასთან დაკავშირებული ნორმები დეტალურად გაიწერება;
• ყველა ამომრჩეველი, მიუხედავად იმისა ტრადიციული ფორმით მიიღებს არჩევნებში მონაწილეობას თუ ელექტრონული საშუალებების გამოყენებით, დაექვემდებარება მარკირებას;
• არჩევნების დასრულების შემდეგ ელექტრონული აპარატიდან ამობეჭდილი ფურცელი იქნება წინასწარი შედეგების შემაჯამებელი, ხოლო შემდგომში თითოეული კომისია მყისიერად დაიწყებს ბიულეტენების ხელით დათვლას, რაც შემაჯამებელი ოქმის სახით იქნება წარდგენილი;
• შეზღუდული შესაძლებლობების მქონე ამომრჩევლებთან დაკავშირებული ნორმები, რომელიც პირველი მოსმენის დროს გადავიდა ძირითად კანონმდებლობაში, კვლავ დაბრუნდება გარდამავალ დებულებებში, გამომდინარე იქიდან, რომ ყველა საარჩევნო უბანი სათანადოდ ჯერ არ არის მოწყობილი და აღნიშნულ საკითხზე რეკომენდაცია ასახულია ვენეციის კომისიისა და ეუთო/ODIHR-ის ერთობლივ წინასწარ დასკვნაში.

პროექტის თანახმად, ორგანიზაციის ადგილობრივი დამკვირვებელი არ შეიძლება იყოს პირი, თუ იგი ბოლოს ჩატარებული ორი საერთო არჩევნებიდან ან ბოლოს ჩატარებული ორი შუალედური არჩევნებიდან რომელიმე არჩევნების დანიშვნის შემდეგ იყო პარტიის მიერ დანიშნული კომისიის წევრი, საარჩევნო სუბიექტი ან საარჩევნო სუბიექტის წარმომადგენელი.

დისციპლინური პასუხისმგებლობის დაკისრება-არდაკისრების ვადასთან დაკავშირებით, პირველი მოსმენის დროს, 30-დღიანი ვადა შემცირდა 15 დღემდე, თუმცა, რეკომენდაციებში გამოითქვა მოსაზრება, რომ ეს ვადაც ხანგრძლივია. აქედან გამომდინარე, არჩვენების დღესთან დაკავშირებით ეს ვადა მცირდება 12 დღემდე, ხოლო არჩევნების დღემდე მომხდარ ფაქტთან დაკავშირებით ვადა მცირდება 7 დღემდე.

საარჩევნო კამპანიის დაფინანსების წესების დარღვევისთვის პასუხისმგებლობის დაკისრების ხანდაზმულობის ვადა სამი წლიდან გაიზრდება ექვს წლამდე. ასევე, არასაარჩევნო პერიოდში ადმინისტრაციულ სამართალდარღვევაზე რეაგირების 60-დღიანი ვადა 30 დღემდე შემცირდება.

სხდომაზე წარმოდგენილი ცვლილებების თანახმად, საუბნო საარჩევნო კომისიაში პარტიის მიერ დანიშნულ წევრებს უნდა ჰქონდეთ შესაბამისი სერტიფიკატი. აღნიშნული პოზიცია დაფიქსირებულია ვენეციის კომისიისა და ეუთო/ODIHR-ის ერთობლივ წინასწარ დასკვნაშიც, თუმცა ამ ჩანაწერის კანონპროექტში დამატებას არ დაეთანხმა საპარლამენტო ოპოზიციის წევრი. საბოლოო გადაწყვეტილება დარჩება თუ არა ეს ჩანაწერი კანონპროექტში გადაწყდება პლენარულ სხდომაზე ცვლილებების მეორე მოსმენით განხილვის დროს.