განქორწინება და მასთან დაკავშირებული პრობლემები

როგორ მივმართოთ სასამართლოს განქორწინების მოთხოვნით?

სასამართლოსთვის სარჩელით მიმართვისთვის დაგჭირდებათ ადვოკატი, რომელიც შეადგენს სამართლებრივად გამართულ სარჩელს და მთლიანად წარუძღვება განქორწინების პროცესების სასამართლოში წარმართვას.

სარჩელის სასამართლოში შესატანად და განქორწინების სასამართლოს მეშვეობით გადასაწყვეტად აუციელებელია, ვიცოდეთ მეუღლის სახელი, გვარი პირადობის მოწმობის მიხედვით, პირადი ნომერი და მისამართი, სადაც შევძლებთ სარჩელის ჩაბარებას.

რა ხდება იმ შემთხვევაში თუ არ ვიცით მეუღლის საცხოვრებელი ადგილი, მისამართი?

სასამართლო არ მიიღებს სარჩელს წარმოებაში, თუ სარჩელის შესაბამის ველში არ გვექნება მითითებული მოპასუხის (მეუღლის) ძირითადი მისამართი (ფაქტობრივი მისამართი). შესაბამისად, განქორწინების მოთხოვნით სასამართლოსთვის მისამართად აუცილებელია, ვიცოდეთ მეუღლის ფაქტობრივი მისამართი.

რა არის შესარიგებელი ვადა?

სასამართლო იღებს ზომებს მეუღლეთა შესარიგებლად. მას უფლება აქვს, გადადოს საქმის განხილვა და მეუღლეებს დაუნიშნოს ვადა შესარიგებლად, რომელიც არ უნდა აღემატებოდეს ექვს თვეს.

როგორ ხდება განქორწინების რეგისტრაცია?

სასამართლოს მიერ მიღებული კანონიერ ძალაში შესული გადაწყვეტილება მხარეთა განქორწინების შესახებ სარეგისტრაციოდ წარედგინება სახელმწიფო სერვისების განვითარების სააგენტოს ნებისმიერ ტერიტორიულ სამსახურს.