სესხი, ქონების დავა, მშობლის უფლებები და მიწის რეგისტრაცია - ადვოკატ ნათია ნაკაშიძის პასუხები აქტუალურ კითხვებზე

ადმინისტრაციული, სამოქალაქო და ბავშვთა უფლებების სპეციალისტი ადვოკატი ნათია ნაკაშიძე მოქალაქეების აქტუალურ კითხვებს პასუხობს.

1 შეკითხვა სამშენებლო კომპანიის დაზარალებული ვარ. ბინის შესაძენად თანხას ვაგროვებდი, მაგრამ გადავწყვიტე ბინის დაგირავება და თანხა კომპანიას მივეცი. თავდაპირველად იხდიდნენ ქირას, შემდეგ კი ყოველთვიურად მიწევს თანხის მოთხოვნა და ხშირად ვერ ვიღებ. თანხას არ მიბრუნებენ. სასამართლოსთვის ბაჟის თანხა არ მაქვს. როგორ მოვიქცე?

პასუხი: თუ თქვენი ფინანსური მდგომარეობის გამო ვერ ახერხებთ სასამართლო ბაჟის გადახდას, სასამართლოს შეგიძლიათ მიმართოთ შესაბამისი მტკიცებულებებით. სასამართლოს შეუძლია გაგათავისუფლოთ ბაჟის გადასახადისგან ან გადაგივადოთ მისი გადახდა. მოსამართლე გადაწყვეტილებას იღებს წარდგენილი მტკიცებულებების საფუძველზე.

2 შეკითხვა მაქვს სესხი, რომელსაც ვერ ვფარავ. რეგისტრირებული ვარ მშობლების სახლში. რის ყადაღას შეიძლება დაექვემდებაროს ჩემი ვალის გამო? შესაძლებელია თუ არა სახლის ნივთების რეალიზაცია?

პასუხი: მნიშვნელოვანია, ხართ თუ არა სახლის თანამესაკუთრე, თუ მხოლოდ რეგისტრირებული. თუ მხოლოდ რეგისტრირებული ხართ, აღსრულების ბიურო მიიჩნევს, რომ სახლის ნივთები თქვენი საკუთრებაა, სანამ საწინააღმდეგო არ დადასტურდება. ასეთ შემთხვევაში საჭიროა აღსრულების მოქმედების სასამართლოში გასაჩივრება. თუ თანამესაკუთრე ხართ, შესაძლებელია თქვენი წილი უძრავი ქონების რეალიზაცია.

3 შეკითხვა მსურს, რომ ჩემი შვილების მამას ჩამოვართვა მამობის უფლებები. აქვს თუ არა სასამართლო პროცესს შედეგი?

პასუხი: მამობის უფლების ჩამორთმევა შესაძლებელია მხოლოდ სასამართლოს გადაწყვეტილებით, თუ არსებობს სათანადო საფუძვლები, როგორიცაა მშობლის მხრიდან მოვალეობების უხეში და სისტემატური დარღვევა, ძალადობა, მავნე ჩვევები ან ბავშვის ჩაბმა არასათანადო საქმიანობაში. ასეთ შემთხვევებში სასამართლო პროცესს აზრი აქვს.

4 შეკითხვა მეზობელმა უკანონოდ დაირეგისტრირა გზა, რომლის საშუალებითაც მიწევს ჩემს ნაკვეთთან მისვლა. საჯარო რეესტრში მითხრეს, რომ ამ ტიპის რეგისტრაცია ადრე შესაძლებელი იყო. მერიას შეუძლია თუ არა ჩემი მიწის ნაკვეთამდე მისასვლელი გზის გამოყოფა?

პასუხი: მერიის პირდაპირი ვალდებულება არ არის გზის გამოყოფა. საჯარო რეესტრის მიერ განხორციელებული რეგისტრაციის გაბათილება შესაძლებელია მხოლოდ ადმინისტრაციული საჩივრის მეშვეობით. აუცილებელია საქმის დეტალური შესწავლა და შემდგომი სამართლებრივი ნაბიჯების განსაზღვრა.

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები