რას გულისხმობს პერსონალურ მონაცემთა დამუშავება

პირის პერსონალური მონაცემები მოიცავს ნებისმიერ ინფორმაციას, რომელიც უკავშირდება იდენტიფიცირებულ ან იდენტიფიცირებად ფიზიკურ პირს.

ამასთან, აღნიშნული ინფორმაცია უნდა იძლეოდეს პირის - მონაცემთა სუბიექტის პირდაპირ ან არაპირდაპირ იდენტიფიცირების საშუალებას საიდენტიფიკაციო ნომრით, ან პირის მახასიათებელი ფიზიკური, ფიზიოლოგიური, ფსიქოლოგიური, ეკონომიკური, კულტურული ან სოციალური ნიშნებით, ხოლო მონაცემთა დამუშავება არის მონაცემთა მიმართ განხორციელებული ნებისმიერი მოქმედება. ეს შეიძლება გამოიხატოს ისეთ მოქმედებაში, როგორიცაა მონაცემთა შეგროვება, ჩაწერა, ფოტოზე აღბეჭდვა, აუდიოჩაწერა, ვიდეოჩაწერა, შენახვა, გამოთხოვა, გამჟღავნება, წაშლა და ა.შ.

რა შეიძლება იყოს ჩვენი მონაცემების დამუშავების საფუძველი?

აღნიშნული გაწერილია კანონით. მონაცემთა დამუშავება დასაშვებია, თუ არსებობს იმ პირის თანხმობა, რომელსაც ეკუთვნის მონაცემები ან მონაცემთა დამუშავება გათვალისწინებულია კანონით. ასევეა შემთხვევები, როდესაც მონაცემები საჯაროდ ხელმისაწვდომია ან მონაცემთა სუბიექტმა ისინი ხელმისაწვდომი გახადა. ან მონაცემთა დამუშავება საჭიროა მონაცემთა დამმუშავებლის მიერ მისთვის კანონმდებლობით დაკისრებული მოვალეობების შესასრულებლად.

იმისთვის, რომ თქვენი მონაცემების დამუშავებისას კანონი არ დაირღვეს, ორგანიზაციამ უნდა დაიცვას კანონით განსაზღვრული პრინციპები:

პერსონალური მონაცემები უნდა დამუშავდეს სამართლიანად და კანონიერად, პიროვნების ღირსების შეულახავად;

მონაცემები უნდა დამუშავდეს იმ მინიმალური მოცულობით, რაც აუცილებელია მონაცემთა დამუშავების კონკრეტული მიზნის მისაღწევად; თავად მონაცემებიც, ამ მიზნის შესაბამისი უნდა იყოს;

მონაცემები უნდა იყოს ნამდვილი და ზუსტი, საჭიროების შემთხვევაში, უნდა განახლდეს, ასევე, უნდა გადამოწმდეს ინფორმაციის წყაროს სანდოობა, გასწორდეს მცდარი და არაზუსტი მონაცემები;

პერსონალური მონაცემები უნდა ინახებოდეს კანონით განსაზღვრული ვადით ან იმ ვადით, რაც აუცილებელია მიზნის მისაღწევად. მიზნის მიღწევის შემდეგ, ისინი უნდა წაიშალოს, ან შეინახოს პირის იდენტიფიცირების გამომრიცხავი ფორმით;

აუცილებელია, არსებობდეს კონკრეტული მიზანი, რისთვისაც ხდება მონაცემთა დამუშავება. სხვა მიზნებით მონაცემების გამოყენება დაუშვებელია.

თქვენ შეგიძლიათ ნებისმიერ კომპანიას თუ საჯარო უწყებას მოსთხოვოთ ინფორმაცია თუ თქვენი რომელი მონაცემები მუშავდება, რა არის ამ მონაცემთა დამუშავების მიზანი და საფუძველი, რა გზით შეგროვდა ეს მონაცემები და ვისზე გაიცა. თქვენ აღნიშნულ კითხვებზე პასუხი უნდა გეცნობოთ მოთხოვნისთანავე ან გამონაკლის შემთხვევებში მოთხოვნიდან არა უგვიანეს 10 დღეში. ამასთან, თუ უკვე ფლობთ ინფორმაციას, რა მონაცემი მუშავდება თქვენ შესახებ, გაქვთ უფლება მოითხოვოთ მათი ცვლილება ან წაშლა. თქვენი მოთხოვნის შემთხვევაში მონაცემთა დამმუშავებელი ვალდებულია გაასწოროს, განაახლოს, დაამატოს, დაბლოკოს, წაშალოს ან გაანადგუროს მონაცემები, თუ ისინი არასრულია, არაზუსტია, არ არის განახლებული ან თუ მათი შეგროვება და დამუშავება განხორციელდა კანონის საწინააღმდეგოდ. ასეთი ტიპის მოთხოვნის დაყენების უფლება მოქალაქეს აქვს როგორც ზეპირად, ისე წერილობით,

კანონი ადგენს, რომ მონაცემთა სუბიექტს უფლება აქვს ნებისმიერ დროს, განმარტების გარეშე უარი განაცხადოს მის მიერვე მიცემულ თანხმობაზე, მოითხოვოს მონაცემთა დამუშავების შეწყვეტა და უკვე დამუშავებულ მონაცემთა განადგურებაც კი. მონაცემთა დამმუშავებელი ვალდებულია 5 დღის ვადაში შეწყვიტოს მონაცემთა დამუშავება, თუ არ არსებობს მონაცემთა დამუშავების სხვა საფუძველი.

თუ პირის მონაცემები უკანონოდ დაამუშავეს?

აღნიშნულისათვის გათვალისწინებულია როგორც გაფრთხილება, ისე ჯარიმა. ჯარიმის ოდენობა დამოკიდებულია დარღვევის ხარისხსა და განმეორებითობაზე. იგი შეიძლება სხვადასხვა დარღვევისათვის იყოს 500-დან 10.000 ლარამდე.

დამატებითი ინფორმაციის მიღების მიზნით დაუკავშირდით საერთაშორისო საადვოკატო კომპანია ,,ნაკაშიძე&პარტნიორები/ Law Office Nakashidze&Partners''-ს.

ვუზრუნველვყობთ თქვენს დაცვას/წარმომადგენლობას: საქართველოსა და იტალიაში ყველა ინსტანციის სასამართლოში; ადმინისტრაციულ ორგანოებში,საელჩო,საკონსულო,იუსტიციის სახლში და სამინისტროებში; სამართლებრივი ურთიერთობის რეგულირებას ფიზიკურ და იურიდიულ პირებთან;სტრასბურგის-ადამიანის უფლებათა ევროპულ სასამართლოში.