ადვოკატი ნათია ნაკაშიძე
დირექტორი - საადვოკატო ბიურო „ნაკაშიძე და პარტნიორები"
ადვოკატი | საერთო სპეციალიზაცია | ბავშვთა უფლებებში სპეციალიზირებული

გამოქვეყნების თარიღი: 19 ოქტომბერი, 2026
ბოლო განახლება: 19 ოქტომბერი, 2026

მემკვიდრეობა ონლაინ, როგორ მივიღოთ მემკვიდრეობა საქართველოში, თუ 6-თვიანი ვადა გავიდა?

„შენ უკვე გათხოვილი ხარ, სამზითვო მიიღე და მამის სახლიდან წილი აღარ გეკუთვნის!“

წარმოიდგინეთ, რომ წლების განმავლობაში საზღვარგარეთ ცხოვრობთ, მუშაობთ, ზრუნავთ საკუთარ მშობლებზე, მათი გარდაცვალების შემდეგ კი იგებთ, რომ საქართველოში დარჩენილ ქონებაზე პრეტენზიის გამოთქმის უფლებას გართმევენ.

შესაძლოა, გეუბნებიან, რომ საცხოვრებელი სახლი მხოლოდ თქვენს ძმას ეკუთვნის. შესაძლოა, ნოტარიუსთან მისვლისას აღმოაჩინეთ, რომ მემკვიდრეობის მიღების ექვსთვიანი ვადა უკვე გასულია.

და ყველაზე მტკივნეული შეკითხვა სწორედ მაშინ ჩნდება: მართლა დაკარგეთ მშობლის ქონებიდან თქვენი კუთვნილი წილის მიღების შესაძლებლობა?

პასუხი ყოველთვის უარყოფითი არ არის.

საქართველოს კანონმდებლობა მემკვიდრეობის უფლების დაცვის რამდენიმე სამართლებრივ შესაძლებლობას ითვალისწინებს, მათ შორის მაშინაც, როდესაც მემკვიდრე საზღვარგარეთ ცხოვრობს ან სამკვიდროს მიღების ვადა უკვე გასულია.

მნიშვნელოვანია არა მხოლოდ ის, როდის მიმართეთ ნოტარიუსს, არამედ ისიც, რა მოქმედებები განახორციელეთ მშობლის გარდაცვალების შემდეგ, რა მტკიცებულებები გაქვთ და როგორია საქმის კონკრეტული გარემოებები.

ამ სტატიაში საადვოკატო ბიურო „ნაკაშიძე და პარტნიორების“ ადვოკატი ნათია ნაკაშიძე განმარტავს, როგორ ხდება მემკვიდრეობის მიღება საქართველოში, რა უფლებები აქვთ ემიგრანტებს, როგორ მტკიცდება სამკვიდროს ფაქტობრივი მიღება და როდის შეიძლება სასამართლოსთვის მიმართვა.

ვიდეო,  მემკვიდრეობის მიღება საქართველოში საზღვარგარეთიდან 

რა არის მემკვიდრეობა და ვის ეკუთვნის გარდაცვლილის ქონება?

საქართველოს სამოქალაქო კოდექსის 1306-ე მუხლის თანახმად, გარდაცვლილი პირის ქონება მემკვიდრეებზე შეიძლება გადავიდეს კანონით, ანდერძით ან ორივე საფუძვლით.

კანონით მემკვიდრეობისას ქონება ნაწილდება კანონით განსაზღვრულ მემკვიდრეებს შორის, შესაბამისი რიგითობისა და მათთვის მინიჭებული უფლებების გათვალისწინებით.

ანდერძით მემკვიდრეობისას ქონების განაწილების საფუძველია მამკვიდრებლის მიერ გამოხატული ნება, თუმცა კანონმდებლობა გარკვეულ მემკვიდრეებს სავალდებულო წილის მოთხოვნის უფლებასაც ანიჭებს.

სამოქალაქო კოდექსის 1336-ე მუხლით პირველი რიგის კანონით მემკვიდრეები არიან გარდაცვლილის შვილები, მეუღლე და მშობლები. ამ რიგის მემკვიდრეებს კანონით თანასწორი მემკვიდრეობითი უფლებები აქვთ.

ამიტომ, თუ მშობელს დარჩა ქალიშვილი და ვაჟი, ქალიშვილი მხოლოდ სქესის, დაოჯახების ან საზღვარგარეთ საცხოვრებლად გადასვლის გამო არ კარგავს კანონით მინიჭებულ მემკვიდრეობის უფლებას.

კონკრეტული სამკვიდრო წილის განსაზღვრისთვის კი უნდა გაირკვეს, არსებობს თუ არა ანდერძი, ვინ არიან მემკვიდრეები, რომელი ქონება ეკუთვნოდა გარდაცვლილს და რა უფლებები ჰქონდათ სხვა პირებს ამ ქონებაზე.

დაოჯახებულ ქალიშვილს მამის სახლიდან წილი ეკუთვნის? 

ოჯახებში დღემდე გვხვდება შეხედულება, თითქოს მშობლების ქონებაზე უპირატესი უფლება ვაჟს აქვს, ხოლო ქალიშვილს, რომელიც გათხოვდა ან სამზითვო მიიღო, მემკვიდრეობის მოთხოვნა აღარ შეუძლია.

ეს შეხედულება კანონით მემკვიდრეობის ზოგად წესს არ შეესაბამება.

საქართველოს სამოქალაქო კოდექსი ქალიშვილისა და ვაჟის მემკვიდრეობით უფლებებს ერთმანეთისგან არ განასხვავებს.

მნიშვნელოვანია რამდენიმე გარემოების ერთმანეთისგან გამიჯვნა.

დაოჯახება არ წარმოადგენს კანონით მემკვიდრეობის უფლების დაკარგვის საფუძველს. საზღვარგარეთ ცხოვრება თავისთავად არ ცვლის პირის მემკვიდრის სტატუსს. სამზითვოს ან სხვა ქონების მიღებაც ავტომატურად არ ნიშნავს სამკვიდრო წილზე სამართლებრივ უარს.

ამასთან, თუ მშობელმა სიცოცხლეში შვილს გარკვეული ქონება გადასცა, კონკრეტული გადაცემის სამართლებრივმა საფუძველმა და პირობებმა შესაძლოა ცალკეულ შემთხვევებში მნიშვნელობა შეიძინოს, მათ შორის სავალდებულო წილის განსაზღვრისას.

მთავარია იცოდეთ: ოჯახის წევრის ზეპირი განცხადება, რომ „მემკვიდრეობა არ გეკუთვნით“, სასამართლოს გადაწყვეტილებას ან კანონით დადგენილ წესს ვერ ჩაანაცვლებს.

თუ ვინმე გთხოვთ ხელი მოაწეროთ მემკვიდრეობასთან დაკავშირებულ დოკუმენტს, პირველ რიგში უნდა გაირკვეს, რა სამართლებრივ შედეგს გამოიწვევს თქვენი ხელმოწერა.

მემკვიდრეობის მიღების 6-თვიანი ვადა, როდის იწყება და რას ნიშნავს მისი გასვლა?

მემკვიდრეობის მიღებისას ერთ-ერთი ყველაზე მნიშვნელოვანი საკითხია კანონით განსაზღვრული ვადის დაცვა.

საქართველოს სამოქალაქო კოდექსის 1424-ე მუხლის მიხედვით, სამკვიდრო მიღებულ უნდა იქნეს სამკვიდროს გახსნის დღიდან ექვსი თვის განმავლობაში. როგორც წესი, სამკვიდროს გახსნა დაკავშირებულია მამკვიდრებლის გარდაცვალებასთან.

მაგრამ აქ არსებობს მნიშვნელოვანი სამართლებრივი განსხვავება:

სამკვიდროს მიღება და სამკვიდრო მოწმობის მიღება ერთი და იგივე მოქმედება არ არის.

სამკვიდროს მიღება შეიძლება მოხდეს კანონით გათვალისწინებული წესით, მათ შორის სანოტარო ბიუროში განცხადების შეტანით ან ქონების ფაქტობრივი ფლობისა და მართვის დაწყებით.

შესაბამისად, თუ ექვსთვიან პერიოდში ნოტარიუსთან არ მისულხართ, აუცილებელია გამოიკვლიოთ, ხომ არ მიიღეთ სამკვიდრო ფაქტობრივად.

მაგალითად, შესაძლოა მშობლის გარდაცვალების შემდეგ გააგრძელეთ მისი ქონების მოვლა, მართავდით საცხოვრებელ სახლს, გადაიხადეთ მასთან დაკავშირებული გადასახადები ან დაეუფლეთ გარდაცვლილის კუთვნილ გარკვეულ ნივთებს.

ასეთი გარემოებები შესაბამისი მტკიცებულებების არსებობისას შეიძლება მნიშვნელოვანი აღმოჩნდეს.

თუმცა არც ერთი მოქმედება არ იძლევა ავტომატურ გარანტიას, რომ სამკვიდრო მიღებულად ჩაითვლება.

რა არის სამკვიდროს ფაქტობრივი მიღება და როგორ შეიძლება მისი დამტკიცება?

სამოქალაქო კოდექსის 1421-ე მუხლი ითვალისწინებს სამკვიდროს მიღებას არა მხოლოდ ნოტარიუსისთვის განცხადების წარდგენით, არამედ ფაქტობრივი ფლობით ან მართვითაც.

ეს ნიშნავს, რომ სამართლებრივი მნიშვნელობა შეიძლება ჰქონდეს მემკვიდრის ისეთ მოქმედებებს, რომლებიც ადასტურებს მის ნებას, სამკვიდრო ქონებას როგორც საკუთარ ქონებას დაეუფლოს ან მართოს.

მაგალითად:

(ა) გარდაცვლილის საცხოვრებელი სახლის ფაქტობრივი ფლობა და მოვლა;

(ბ) სამკვიდრო ქონების მართვა და მის შენარჩუნებაზე ზრუნვა;

(გ) ქონებასთან დაკავშირებული გადასახადებისა და აუცილებელი ხარჯების გადახდა;

(დ) გარდაცვლილის კუთვნილი ნივთების საკუთარ მფლობელობაში მიღება;

(ე) სამკვიდრო ქონების გაქირავება ან მისი მართვის სხვა ფაქტობრივი მოქმედებები.

განსაკუთრებით საყურადღებოა მოძრავი ნივთების საკითხი, წარმოიდგინეთ, რომ მშობლის გარდაცვალების შემდეგ მემკვიდრემ დაიტოვა მისი კუთვნილი ოქროს ბეჭედი ან სხვა პირადი ნივთი და მას, როგორც საკუთარ ქონებას, დაეუფლა.

შესაძლებელია თუ არა ამ გარემოების გამოყენება სამკვიდროს ფაქტობრივი მიღების დასამტკიცებლად?

შესაძლებელია, თუ დადასტურდება შესაბამისი სამართლებრივი წინაპირობები.

მნიშვნელოვანია, რომ ნივთი ეკუთვნოდა გარდაცვლილს, მემკვიდრე მას დაეუფლა კანონით დადგენილ პერიოდში და მისი მოქმედება რეალურად გამოხატავდა სამკვიდროს მიღების ნებას.

სამოქალაქო კოდექსის 1421-ე მუხლის მესამე ნაწილის მიხედვით, სამკვიდროს ნაწილის ფაქტობრივი ფლობის დაწყება, შესაბამისი წინაპირობების არსებობისას, მთლიანად სამკვიდროს მიღებად მიიჩნევა.

ეს ნორმა განსაკუთრებით მნიშვნელოვანია იმ საქმეებში, სადაც მემკვიდრეს დროულად არ მიუმართავს ნოტარიუსისთვის, თუმცა არსებობს ქონების ფაქტობრივი მიღების დამადასტურებელი მტკიცებულებები.

რა მტკიცებულებები უნდა შეინახოთ?

სამკვიდროს ფაქტობრივი მიღების საკითხის შეფასებისას მნიშვნელობა შეიძლება ჰქონდეს საბანკო გადარიცხვებს, კომუნალური გადასახადების ქვითრებს, ქონების მოვლასთან დაკავშირებულ დოკუმენტებს, მიმოწერას, მოწმეების ჩვენებებსა და სხვა შესაბამის მასალებს.

დაკრძალვის ხარჯებთან დაკავშირებული დოკუმენტებიც ზოგჯერ შეიძლება წარმოადგენდეს საქმის ფაქტობრივი გარემოებების ნაწილს, თუმცა მხოლოდ დაკრძალვის დაფინანსება თავისთავად არ ნიშნავს სამკვიდროს ფაქტობრივ მიღებას.

სასამართლო აფასებს არა მხოლოდ ცალკეულ დოკუმენტს, არამედ მტკიცებულებათა ერთობლიობას, მათი წარმოშობის დროსა და კავშირს სამკვიდრო ქონების ფლობასთან ან მართვასთან.

მემკვიდრეობის მიღების ვადა გავიდა, შეიძლება მისი გაგრძელება?

ექვსთვიანი ვადის გასვლის შემდეგ ხშირად ფიქრობენ, რომ მემკვიდრეობის მიღება საბოლოოდ შეუძლებელია.

თუმცა საქართველოს სამოქალაქო კოდექსის 1426-ე მუხლი ითვალისწინებს სამკვიდროს მისაღებად დადგენილი ვადის გაგრძელების შესაძლებლობას.

არსებობს ორი მნიშვნელოვანი სამართლებრივი გზა.

პირველი: სასამართლოსთვის მიმართვა. სასამართლოს შეუძლია გააგრძელოს სამკვიდროს მიღების ვადა, თუ ვადის გადაცილების მიზეზებს საპატიოდ მიიჩნევს.

მეორე: სხვა მემკვიდრეების თანხმობა. კანონით განსაზღვრულ შემთხვევებში, თუ სამკვიდროს მიმღები ყველა მემკვიდრე თანახმაა, სამკვიდროს მიღება ვადის გასვლის შემდეგ სასამართლოსთვის მიმართვის გარეშეც არის შესაძლებელი.

ამასთან, მნიშვნელოვანია განსხვავება: თუ მემკვიდრემ სამკვიდრო კანონით დადგენილ ექვსთვიან პერიოდში ფაქტობრივად მიიღო, სამართლებრივი საკითხი შეიძლება ეხებოდეს უკვე მომხდარი მიღების დადასტურებას და არა ვადის გაგრძელებას.

განსაკუთრებით ემიგრანტებმა უნდა გაითვალისწინონ: მხოლოდ საზღვარგარეთ ცხოვრება ავტომატურად არ წარმოადგენს სამკვიდროს მიღების ვადის გაგრძელების საპატიო მიზეზს.

საჭიროა დადგინდეს, კონკრეტულად რა გარემოებამ შეუშალა ხელი მემკვიდრეს დროულ მოქმედებაში და რა მტკიცებულებებით დასტურდება აღნიშნული გარემოება.

ნოტარიუსმა სამკვიდრო მოწმობაზე უარი გითხრათ, რას აკეთებთ შემდეგ?

ნოტარიუსის უარი ხშირად მემკვიდრისთვის საბოლოო პასუხად აღიქმება. რეალურად, უარის მიზეზის სამართლებრივ შეფასებას გადამწყვეტი მნიშვნელობა აქვს. შესაძლოა ნოტარიუსს არ წარედგინა საკმარისი დოკუმენტაცია, არსებობდეს დავა მემკვიდრეებს შორის ან საჭირო გახდეს ისეთი გარემოების დადგენა, რომელიც მხოლოდ სასამართლოში შეიძლება შეფასდეს.

საქართველოს კანონი „ნოტარიატის შესახებ“ ითვალისწინებს სანოტარო მოქმედების შესრულებაზე უარის წერილობით დასაბუთებას და კანონით დადგენილი წესით გასაჩივრების შესაძლებლობას. ამიტომ პირველ რიგში მნიშვნელოვანია უარის საფუძვლის გაცნობა და იმის დადგენა, რა სამართლებრივი მოქმედებაა საჭირო.

შესაძლოა საკითხი მოგვარდეს დამატებითი მტკიცებულებების წარდგენით; სხვა შემთხვევაში საჭირო გახდეს სასამართლოში მიმართვა, სამკვიდროს ფაქტობრივი მიღების დადგენა ან შესაბამისი სამოქალაქო დავის წარმოება.

ნოტარიუსის უარი ყოველთვის არ ნიშნავს მემკვიდრეობის უფლების საბოლოო დაკარგვას.

საქართველოს კანონი „ნოტარიატის შესახებ“ ითვალისწინებს სანოტარო მოქმედების შესრულებაზე უარის წერილობით დასაბუთებას და კანონით დადგენილი წესით გასაჩივრების შესაძლებლობას.

ამიტომ პირველ რიგში მნიშვნელოვანია უარის საფუძვლის გაცნობა და იმის დადგენა, რა სამართლებრივი მოქმედებაა საჭირო.

შესაძლოა საკითხი მოგვარდეს დამატებითი მტკიცებულებების წარდგენით; სხვა შემთხვევაში საჭირო გახდეს სასამართლოში მიმართვა, სამკვიდროს ფაქტობრივი მიღების დადგენა ან შესაბამისი სამოქალაქო დავის წარმოება.

ნოტარიუსის უარი ყოველთვის არ ნიშნავს მემკვიდრეობის უფლების საბოლოო დაკარგვას.

მემკვიდრეობა ონლაინ, როგორ მივიღოთ სამკვიდრო საქართველოში საზღვარგარეთიდან?

ემიგრაციაში მყოფი საქართველოს მოქალაქეებისთვის ერთ-ერთი ყველაზე აქტუალური შეკითხვაა: შესაძლებელია თუ არა მემკვიდრეობის მიღება საქართველოში ჩამოსვლის გარეშე?

საქართველოს სამოქალაქო კოდექსის 1423-ე მუხლის თანახმად, მემკვიდრეს სამკვიდროს მიღება შეუძლია როგორც პირადად, ისე წარმომადგენლის მეშვეობით. ეს ნიშნავს, რომ შესაბამისი უფლებამოსილების მქონე წარმომადგენელს შეუძლია მემკვიდრის სახელით განახორციელოს კანონით ნებადართული სამართლებრივი მოქმედებები. საქმის გარემოებებიდან გამომდინარე, მომსახურება შეიძლება მოიცავდეს:

1. მემკვიდრეობის უფლების წინასწარ სამართლებრივ შეფასებას;

2. საჭირო დოკუმენტების განსაზღვრასა და შეგროვებას;

3. სათანადო მინდობილობის მომზადებას;

4. ნოტარიუსთან წარმომადგენლობას;

5. ქონების სამართლებრივი მდგომარეობის შემოწმებას;

6. საჯარო რეესტრთან დაკავშირებულ მოქმედებებს;

7. მემკვიდრეობითი დავის შემთხვევაში სასამართლოში წარმომადგენლობას.

აქვე უნდა განვმარტოთ, რომ „მემკვიდრეობა ონლაინ“ არ ნიშნავს ყველა სანოტარო და სარეგისტრაციო მოქმედების ავტომატურად, მხოლოდ ინტერნეტით შესრულებას. ეს გულისხმობს დისტანციურ სამართლებრივ მომსახურებასა და სათანადო წარმომადგენლობის მეშვეობით საქმის წარმოების შესაძლებლობას.

ადვოკატის პრაქტიკიდან რეალური ისტორია, როგორ შეძლო ემიგრანტმა კუთვნილი სამკვიდრო წილის მიღება?

ლალი საზღვარგარეთ ცხოვრობდა. მამის გარდაცვალების შემდეგ ოჯახის წევრებისგან მოისმინა, რომ მშობლის საცხოვრებელი სახლი მის ძმას ეკუთვნოდა, რადგან თავად გათხოვილი იყო და სამზითვოც მიღებული ჰქონდა.  ერთი შეხედვით, ლალის მდგომარეობა რთული ჩანდა: იგი საქართველოში არ ცხოვრობდა და მემკვიდრეობის მიღებასთან დაკავშირებული ვადების საკითხიც არსებობდა. თუმცა სამართლებრივი შეფასებისას მნიშვნელოვანი აღმოჩნდა არა ოჯახის წევრების წარმოდგენა ქონების განაწილებაზე, არამედ კანონით მინიჭებული უფლებები და შესაბამისი მტკიცებულებები.

საქმეში შეგროვებული მტკიცებულებებისა და განხორციელებული სამართლებრივი მოქმედებების შედეგად ლალიმ კუთვნილი სამკვიდრო წილის მიღება შეძლო.

მემკვიდრეობის უფლების არსებობა არ უნდა განსაზღვროთ მხოლოდ ოჯახის წევრების სიტყვებით, ნოტარიუსისთვის მიმართვის დაგვიანებით ან იმით, რომ საზღვარგარეთ ცხოვრობთ. ყოველ კონკრეტულ შემთხვევაში აუცილებელია ფაქტობრივი გარემოებებისა და შესაბამისი სამართლებრივი საფუძვლების შეფასება.

ანდერძი არსებობს, მაინც შეიძლება მემკვიდრეობის მოთხოვნა?

ზოგჯერ მემკვიდრე აღმოაჩენს, რომ გარდაცვლილმა ქონება ანდერძით მხოლოდ ერთ შვილს ან სხვა პირს დაუტოვა. ნიშნავს თუ არა ეს, რომ დანარჩენ შვილებს ქონებიდან წილის მოთხოვნის შესაძლებლობა აღარ აქვთ?

ყოველთვის არა.

საქართველოს სამოქალაქო კოდექსის 1371-ე მუხლის მიხედვით, მამკვიდრებლის შვილებს, მშობლებსა და მეუღლეს ანდერძის შინაარსის მიუხედავად შეიძლება ეკუთვნოდეთ სავალდებულო წილი. კანონით დადგენილი სავალდებულო წილი შეადგენს იმ წილის ნახევარს, რომელსაც შესაბამისი პირი კანონით მემკვიდრეობის შემთხვევაში მიიღებდა.  სავალდებულო წილის მოთხოვნის არსებობა და მოცულობა უნდა შეფასდეს კონკრეტული საქმის მიხედვით, მათ შორის კანონით დადგენილი სხვა პირობებისა და შეზღუდვების გათვალისწინებით.  ამიტომ, თუ მშობელმა ანდერძით ქონება მხოლოდ ერთ მემკვიდრეს დაუტოვა, მნიშვნელოვანია სხვა უფლებამოსილი მემკვიდრეების სამართლებრივი მდგომარეობის შემოწმებაც.

როგორ დავიწყოთ მემკვიდრეობის მიღება, პრაქტიკული ნაბიჯები

თუ მემკვიდრეობის მიღება გსურთ, სასურველია თავდაპირველად განისაზღვროს სამი საკითხი.

პირველი:  თქვენი მემკვიდრეობითი უფლების საფუძველი. საჭიროა გაირკვეს, ხართ თუ არა კანონით ან ანდერძით მემკვიდრე, ვინ არიან სხვა შესაძლო მემკვიდრეები და რა ქონება შედის სამკვიდროში.

მეორე:  ვადები და ფაქტობრივი გარემოებები. უნდა დადგინდეს, როდის გაიხსნა სამკვიდრო, შეტანილია თუ არა განცხადება ნოტარიუსთან და ხომ არ არსებობს ქონების ფაქტობრივი მიღების დამადასტურებელი გარემოებები.

მესამე:  სამართლებრივი მოქმედების სწორი გზა. შესაძლოა საკმარისი აღმოჩნდეს სანოტარო პროცედურა, ხოლო სხვა შემთხვევაში საჭირო გახდეს წარმომადგენლის ჩართვა, დამატებითი მტკიცებულებების მოძიება ან სასამართლოში საქმის წარმოება.

თუ საზღვარგარეთ ცხოვრობთ, სასურველია ადრეულ ეტაპზევე განისაზღვროს, რომელი დოკუმენტების მომზადება შეგიძლიათ დისტანციურად და რა უფლებამოსილებები უნდა მიენიჭოს საქართველოში მოქმედ წარმომადგენელს.

ხშირად დასმული კითხვები მემკვიდრეობის შესახებ

შეიძლება თუ არა მემკვიდრეობის მიღება 6 თვის შემდეგ?

გარკვეულ შემთხვევებში დიახ. საჭიროა გამოიკვლიოთ, ხომ არ მიიღეთ სამკვიდრო ფაქტობრივად. ასევე შესაძლებელია ვადის გაგრძელების საკითხის სასამართლოში დაყენება საპატიო მიზეზის არსებობისას ან კანონით გათვალისწინებული პირობებით სხვა მემკვიდრეების თანხმობის გამოყენება.

თუ გათხოვილი ვარ, მამის ქონებიდან წილი მაინც მეკუთვნის?

კანონით მემკვიდრეობისას ქალიშვილსა და ვაჟს თანასწორი უფლებები აქვთ. გათხოვება თავისთავად მემკვიდრეობის უფლების დაკარგვის საფუძველი არ არის. კონკრეტული წილი დამოკიდებულია სამკვიდროს შემადგენლობაზე, სხვა მემკვიდრეებსა და სამართლებრივ გარემოებებზე.

თუ საზღვარგარეთ ვცხოვრობ, საქართველოში ჩამოსვლა აუცილებელია?

ყველა შემთხვევაში არა. სამკვიდროს მიღება კანონით შესაძლებელია წარმომადგენლის მეშვეობითაც. კონკრეტული დოკუმენტებისა და პროცედურების მოთხოვნები ინდივიდუალურად უნდა შეფასდეს.

თუ ნოტარიუსმა უარი მითხრა, სასამართლოში მიმართვა შემიძლია?

კანონით დადგენილი წესით შესაძლებელია ნოტარიუსის უარის გასაჩივრება. თუმცა საჭირო სამართლებრივი გზა დამოკიდებულია იმაზე, რა მიზეზით ითქვა უარი და რომელი გარემოების დამტკიცებაა აუცილებელი.

თუ მშობლის მხოლოდ ერთი ნივთი დავიტოვე, შემიძლია სამკვიდროს მიღების დამტკიცება?

ეს შესაძლებელია შეფასდეს სამკვიდროს ფაქტობრივი მიღების ერთ-ერთ გარემოებად, თუ ნივთი ნამდვილად ეკუთვნოდა გარდაცვლილს და მას კანონით განსაზღვრულ პერიოდში დაეუფლეთ როგორც სამკვიდრო ქონებას. საბოლოო შეფასება დამოკიდებულია მტკიცებულებათა ერთობლიობაზე.

მემკვიდრეობის ადვოკატი საქართველოში და იტალიაში,  ნათია ნაკაშიძე

მემკვიდრეობის დავა მხოლოდ ქონების განაწილებას არ ეხება. ხშირად ის უკავშირდება ოჯახურ ურთიერთობებს, წლების განმავლობაში დაგროვილ გაურკვევლობას, გამოტოვებულ ვადებსა და რთულად მოსაპოვებელ მტკიცებულებებს.  სწორედ ამიტომ მნიშვნელოვანია, რომ მემკვიდრეობის საკითხი შეფასდეს ინდივიდუალურად, საქართველოს კანონმდებლობისა და კონკრეტული ფაქტობრივი გარემოებების გათვალისწინებით.

ადვოკატი ნათია ნაკაშიძე, საადვოკატო ბიურო „ნაკაშიძე და პარტნიორების“ (Nakashidze & Partners) დამფუძნებელი და მმართველი პარტნიორი, ახორციელებს სამართლებრივ მომსახურებას მემკვიდრეობის მიღების, სამკვიდრო უფლებების დაცვისა და მემკვიდრეობითი დავების მიმართულებით.

ბიუროს ფილიალები ფუნქციონირებს საქართველოში და იტალიაში. იურიდიული კონსულტაციის მიღება შესაძლებელია როგორც ადგილზე, ისე დისტანციურად, საზღვარგარეთიდან.

თუ გეუბნებიან, რომ მემკვიდრეობა არ გეკუთვნით, ჯერ გაარკვიეთ, რას ამბობს კანონი.

თუ მემკვიდრეობის მიღების ვადა გავიდა, ნოტარიუსმა უარი გითხრათ ან ოჯახის წევრებს შორის ქონებრივი დავა წარმოიშვა, საქმის სამართლებრივი შეფასება დაგეხმარებათ შესაძლო მოქმედებებისა და რისკების განსაზღვრაში.

დაჯავშნეთ იურიდიული კონსულტაცია ადვოკატ ნათია ნაკაშიძესთან ონლაინ https://iuristi.com/booking/

📍 საქართველო,  თბილისი, ალექსანდრე ყაზბეგის გამზირი №47, მე-6 სართული, ოფისი №1

📍 იტალია, საადვოკატო ბიუროს ფილიალი

სტატიას აქვს საინფორმაციო ხასიათი. კონკრეტული მემკვიდრეობითი საკითხის გადაწყვეტა დამოკიდებულია საქმის ფაქტობრივ გარემოებებზე, მტკიცებულებებსა და გამოსაყენებელ სამართლებრივ ნორმებზე.