პენსია იტალიაში - ინფორმაცია სრულად

პენსია იტალიაში - როგორ შეგიძლიათ დაინიშნოთ?

იტალიაში დასაქმებული ოჯახების დამხმარეებისთვის ხელმისაწვდომია პენსიის რამდენიმე კატეგორია, იმ შემთხვევაში, თუ ისინი აკმაყოფილებენ შესაბამის საგადასახადო (საპენსიო) შენატანების მოთხოვნებს:

1.ასაკობრივი სახელმწიფო პენსია (Pensione di vecchiaia)
ასაკობრივი სახელმწიფო პენსია არის ძირითადი საპენსიო სარგებელი, რომლის მიღების აუცილებელი პირობაა:

• 67 წლის ასაკის მიღწევა;

• მინიმუმ 20 წლის განმავლობაში (1040 კვირა) INPS-ის სისტემაში განხორციელებული საპენსიო შენატანები.

2.ინვალიდობის პენსია (Pensione di invalidità)
ინვალიდობის პენსიას იღებენ პირები, რომლებსაც ჯანმრთელობის მდგომარეობიდან გამომდინარე მინიჭებული აქვთ შეზღუდული შესაძლებლობის სტატუსი (შშმ), რომლის მინიმალური მაჩვენებელი უნდა იყოს 74%-ზე მეტი. ამ სტატუსს ადგენს შესაბამისი სამედიცინო კომისია.

3.დაგვიანებული ასაკობრივი პენსია (Pensione di vecchiaia contributiva tardiva)
ეს პენსია განკუთვნილია პირებისთვის, რომლებიც სტანდარტული ასაკობრივი პენსიის პირობებს სრულად ვერ აკმაყოფილებენ. აუცილებელი პირობებია:

• მინიმალური ასაკი 71 წელი;

• მინიმუმ 5 წლის (520 კვირა) კონტრიბუტების არსებობა, რომელიც განხორციელებულია 1996 წლის შემდეგ (ახალი საპენსიო სისტემის პირობების შესაბამისად);

• მუდმივი საცხოვრებელი მისამართის ქონა იტალიაში.

4.სოციალური პენსია (Assegno sociale)
სოციალური პენსია ენიჭებათ იმ პირებს, ვისაც არ გააჩნიათ საჭირო რაოდენობის საპენსიო კონტრიბუტები, თუმცა ცხოვრობენ იტალიაში და მათი შემოსავალი დაბალია. უცხო ქვეყნის მოქალაქეებისთვის დამატებითი პირობაა, რომ ქვეყნის დატოვება შესაძლებელია წელიწადში მაქსიმუმ 29 დღით.

აღნიშნული ტიპის პენსიები უზრუნველყოფენ ოჯახის დამხმარეთა სოციალურ დაცვას იტალიის საპენსიო კანონმდებლობის შესაბამისად.

ინვალიდობის პენსია იტალიაში 

იტალიის კანონმდებლობის მიხედვით, ინვალიდობის პენსიის მისაღებად აუცილებელია სამედიცინო კომისიის მიერ მინიმუმ 74%-იანი შეზღუდული შესაძლებლობის (შშმ) სტატუსის დამტკიცება.

არსებობს ინვალიდობის პენსიის ორი ტიპი:

1.ჩვეულებრივი ინვალიდობის დახმარება (Assegno ordinario di invalidità) – ეს პენსია ეფუძნება სამუშაო პერიოდში შეტანილ კონტრიბუტებს. მის მისაღებად აუცილებელია სამუშაო სტაჟის არსებობა და სამედიცინო დასკვნა, რომელიც ადასტურებს პირის შშმ მდგომარეობას.

2. სამოქალაქო ინვალიდობის პენსია (Pensione di invalidità civile) – ამ შემთხვევაში სამუშაო კონტრიბუტები არ მოითხოვება, თუმცა აუცილებელია, პირი იყოს იტალიის რეზიდენტი და ჰქონდეს დადასტურებული მინიმუმ 74%-იანი შშმ სტატუსი.

ორივე ტიპის პენსიის მისაღებად აუცილებელია შესაბამისი სამედიცინო დასკვნა და განაცხადის გაკეთება INPS-ში (იტალიის სოციალური დაზღვევის სამსახური).

დედობის პენსია (Pensione di maternità)

ინვალიდობის პენსიის მოთხოვნისას, დედებს უფლება აქვთ, მოითხოვონ დედობის პენსია, რომელიც წარმოადგენს დამატებით სტაჟს შვილების რაოდენობის მიხედვით:

1 შვილის შემთხვევაში სტაჟს ემატება 4 თვე;

2 ან მეტი შვილის შემთხვევაში სტაჟს ემატება 8 თვე.

აღნიშნული სტაჟი გამოიყენება საერთო სამუშაო სტაჟის გაზრდისთვის, რაც ზოგიერთ შემთხვევაში საშუალებას იძლევა პენსიაზე ადრე გასვლის.

გაითვალისწინეთ:

• დედობის პენსიის მოთხოვნა შესაძლებელია მხოლოდ პენსიის განაცხადის გაკეთების დროს.

• საჭიროა შვილების დაბადების მოწმობების იტალიურ ენაზე ნათარგმნი და აპოსტილით დამოწმებული ასლები.

პენსიის დანიშვნის შესახებ მნიშვნელოვანი ინფორმაცია:

მეცამეტე პენსია:

მეცამეტე პენსია ავტომატურად ენიჭება პენსიონერს დეკემბრის თვის სტანდარტულ პენსიასთან ერთად. მისი მისაღებად ცალკე განაცხადის წარდგენა საჭირო არ არის.

მეთოთხმეტე პენსია:

როდესაც პენსია უკვე დანიშნულია, რეკომენდებულია დროულად მოითხოვოთ მეთოთხმეტე პენსიის დანიშვნა. მეთოთხმეტე პენსია გაიცემა წელიწადში ერთხელ, ივნისისა ან ივლისის თვეში.

მეთოთხმეტე პენსიის მიღება შესაძლებელია იმ შემთხვევაში, თუ პენსიონერის წლიური შემოსავალი არ აღემატება 16 000 ევროს.

მეთოთხმეტე პენსიის მისაღებად საჭირო პროცედურა:

• საქართველოს სოციალური უზრუნველყოფის სამსახურიდან აიღეთ ბოლო ერთი წლის პენსიის წლიური შემოსავლის დამადასტურებელი ცნობა.

• აღნიშნული ცნობა უნდა დაამოწმოთ ნოტარიულად, თარგმნოთ იტალიურ ენაზე და დაადასტუროთ აპოსტილით საქართველოს იუსტიციის სახლში.

• იტალიის საკონსულოს მიერ ამ დოკუმენტის ლეგალიზაცია საჭირო არ არის.

პენსიის დანიშვნისთვის საჭირო დოკუმენტები:

1.პასპორტი (Passaporto)

2. პირადობის მოწმობა (Carta d’identità)

3. ფისკალური კოდი (Codice fiscale)

4. ბინადრობის ნებართვა (Permesso di soggiorno) – მისაღებია მინიმუმ 2-წლიანი ნებართვა.

5. საცხოვრებელი მისამართის დამადასტურებელი დოკუმენტი (Residenza)

6. საბანკო ანგარიშის რეკვიზიტები (IBAN) – იმ ქვეყნის, რომელშიც გსურთ პენსიის ჩარიცხვა.

7. შვილების დაბადების მოწმობა (Certificato di nascita dei figli) – დედობის პენსიის შემთხვევაში.

8. საქართველოს სოციალური უზრუნველყოფის მიერ გაცემული წლიური პენსიის შემოსავლის დამადასტურებელი ცნობა (Certificato del reddito annuale della pensione dalla previdenza sociale georgiana) – მეთოთხმეტე პენსიის მოთხოვნისთვის.

ზემოთ მოცემული დოკუმენტების დროული მომზადება და შესაბამისი პროცედურების დაცვა უზრუნველყოფს პენსიის შეუფერხებლად მიღებას.

გაითვალისწინეთ: საქართველოს მოქალაქეს, რომელსაც აქვს უცხო ქვეყნის პენსია დანიშნული, პარალელურად უფლება აქვს მიიღოს საქართველოში ასაკობრივი პენსია!

როგორ გადავიტანოთ იტალიური პენსია საქართველოში?

იტალიაში მიღებული პენსიის საქართველოში გადატანა რამდენიმე მარტივი ეტაპით ხორციელდება:

1. პენსიის დანიშვნისას მითითება

პენსიის დანიშვნის მოთხოვნისას, საქმის მწარმოებელს აუცილებლად აცნობეთ, რომ გსურთ პენსიის პირდაპირ საქართველოში ჩარიცხვა. ეს შეამცირებს შემდგომში საჭირო ადმინისტრაციულ პროცედურებს.

2. საცხოვრებელი მისამართის შეცვლა

საქართველოში დაბრუნებამდე:

• ეწვიეთ თქვენს მუნიციპალიტეტს (Anagrafe), სადაც თქვენი მისამართია რეგისტრირებული.

• შეავსეთ სპეციალური ფორმა, რომელშიც მიუთითებთ, რომ აპირებთ საცხოვრებლად საქართველოში დაბრუნებას.

• ოფიციალური ცვლილება განხორციელდება განაცხადის გაკეთებიდან დაახლოებით 45 დღეში.

აუცილებლად უნდა აცნობოთ ახალი მისამართი იტალიის სოციალურ დაზღვევის სააგენტოს (INPS) და იტალიის საგადასახადო სააგენტოს (Agenzia delle Entrate), რათა არ შეიქმნას პრობლემები საგადასახადო დეკლარაციის (7/30) წარდგენასთან დაკავშირებით.

3. იტალიური IBAN-ის ჩანაცვლება ქართული IBAN-ით

იტალიური პენსიის მისაღებად საქართველოში უნდა გქონდეთ ანგარიშის ნომერი (IBAN), რომელიც რეგისტრირებულია რომელიმე ქართულ ბანკში (მაგალითად, საქართველოს ბანკი).

INPS-სთვის IBAN-ის დასადასტურებლად საჭიროა:

1.ბანკის მიერ ხელმოწერილი და ბეჭდით დამოწმებული საბანკო რეკვიზიტების დოკუმენტი.

2. ბანკის მიერ სპეციალური ფორმის შევსება, სადაც მითითებულია თქვენი იტალიურ პირადობაში არსებული პირადი მონაცემები, ქართული IBAN-ი და ბანკის სრული ინფორმაცია.

4. ცოცხლად ყოფნის დამადასტურებელი სერტიფიკატი

იტალიის სახელმწიფო ყოველწლიურად ითხოვს ცოცხლად ყოფნის დამადასტურებელ სერტიფიკატს (Certificato di esistenza in vita), რომელსაც გასცემს საერთაშორისო საგადასახადო სააგენტო (CITI – Citibank). ამ სერტიფიკატის არარსებობის შემთხვევაში INPS წლის ბოლოს აჩერებს პენსიის გადახდას.

დამატებითი ინფორმაცია პენსიის ოდენობის შესახებ

იტალიის საპენსიო სისტემა ეფუძნება კონტრიბუციების პრინციპს. ამასთან, პენსიის ოდენობაზე განსაკუთრებით მოქმედებს ბოლო წლებში მიღებული ანაზღაურება, განსაკუთრებით ბოლო 5-10 წლის განმავლობაში. შესაბამისად, სასურველია პენსიაზე გასვლის წინა წლებში გქონდეთ მაღალი შემოსავლის კონტრაქტები.

საქართველოს მოქალაქის უფლება დამატებით პენსიაზე

გაითვალისწინეთ, საქართველოს მოქალაქეებს, რომლებიც იღებენ უცხოურ პენსიას, ასევე აქვთ უფლება პარალელურად ისარგებლონ საქართველოში არსებული ასაკობრივი პენსიით.

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები