"საავტორო და მომიჯნავე უფლებების შესახებ” კანონში ცვლილებების პროექტი

კულტურის კომიტეტში ქონებრივი უფლებების კოლექტიურ მართვასთან დაკავშირებით „საავტორო და მომიჯნავე უფლებების შესახებ” კანონში ცვლილებების პროექტის განსახილველად საჯარო-კერძო დიალოგი გაიმართა. მასში ჩართული იყვნენ კულტურის კომიტეტის წევრები, საქართველოს ინტელექტუალური საკუთრების ეროვნული ცენტრის - საქპატენტის, USAID-ის და აშშ-ის ვაჭრობის დეპარტამენტის კომერციული სამართლის განვითარების პროგრამის (CLDP) წარმომადგენლები.

საქართველოს პარლამენტის ინფორმაციით, დიალოგის მიზანი ღია და ინკლუზიური დიალოგის გზით, შეთავაზებული პროექტის დახვეწა და ისეთი საკანონმდებლო ცვლილებების განხორციელებაა, რომელიც ხელს შეუწყობს ინტელექტუალური საკუთრების უფლებების დაცვას და შემოქმედებითი ინდუსტრიების სექტორის განვითარებას საქართველოში.

კომიტეტის თავმჯდომარის, ელისო ბოლქვაძის განცხადებით,2021 წელს კულტურის კომიტეტს მიმართა სხვადასხვა ავტორ-შემსრულებელმა საავტორო და მომიჯნავე უფლებების შესახებ კანონის გადახედვის მოთხოვნით.

„საქმე ეხებოდა კოლექტიურ საფუძველზე ქონებრივი მართვის კუთხით არსებული პრობლემების სათანადო დარეგულირებას. ზემოაღნიშნულიდან გამომდინარე, კერძო სექტორის წარმომადგენლების მიერ წამოჭრილი საკითხების საპასუხოდ, კულტურის კომიტეტმა შექმნა სამუშაო ჯგუფი საკანონმდებლო და ინსტიტუციური ჩარჩოს გასაუმჯობესებლად. დღეს მეორედ გაიმართა საქპატენტის, USAID-სა და აშშ-ს ვაჭრობის დეპარტამენტის სამართლის განვითარების პროგრამის (CLDP-ის) ერთობლივი საჯარო დიალოგი საავტორო და მომიჯნავე უფლებების კოლექტიური მართვის კუთხით არსებული გამოწვევებისა და საკანონმდებლო დონეზე მათი დაძლევის გზების შესახებ“,- განაცხადა ელისო ბოლქვაძემ.

როგორც დიალოგის პროცესში ექსპერტების მხრიდან გამოიკვეთა, კოლექტიური მართვა გადამწყვეტ როლს ასრულებს მეცნიერების, ლიტერატურისა და ხელოვნების ნაწარმოებთა ავტორების, შემსრულებლების, ფონოგრამის, ვიდეოგრამისა და მონაცემთა ბაზის დამამზადებლების, აგრეთვე საავტორო და მომიჯნავე უფლებების სხვა მფლობელების ქონებრივი უფლებების დაცვაში; კოლექტიური მართვა ხელს უწყობს ასევე ნამუშევრების დაცვას და უზრუნველყოფს ავტორების მიერ სამართლიანი ეკონომიკური სარგებლის მიღებას, საკუთარი შემოქმედებითი საქმიანობისთვის.

მომზადდა ცვლილებების პროექტი „საავტორო და მომიჯნავე უფლებების შესახებ“ საქართველოს კანონში, რომელიც დიალოგის პროცესში მიღებული რეკომენდაციების შესაბამისად დაიხვეწება.

დამატებითი ინფორმაციის მიღების მიზნით დაუკავშირდით საერთაშორისო საადვოკატო კომპანია ,,ნაკაშიძე&პარტნიორები/ Law Office Nakashidze&Partners''-ს.

ვუზრუნველვყობთ თქვენს დაცვას/წარმომადგენლობას: საქართველოსა და იტალიაში ყველა ინსტანციის სასამართლოში; ადმინისტრაციულ ორგანოებში,საელჩო,საკონსულო,იუსტიციის სახლში და სამინისტროებში; სამართლებრივი ურთიერთობის რეგულირებას ფიზიკურ და იურიდიულ პირებთან;სტრასბურგის-ადამიანის უფლებათა ევროპულ სასამართლოში.