სახალხო დამცველის მოადგილე ინსპექტორის სამსახურის გაუქმებაზე - ეს არის ერთ-ერთი ის გადაწყვეტილება, რომელიც „სანიმუშოდ“ ჩაიწერება ამ პარლამენტის ისტორიაში

ალბათ, ეს არის ერთ-ერთი ის გადაწყვეტილება, რომელიც „სანიმუშოდ“ ჩაიწერება ამ პარლამენტის ისტორიაში,-ასე შეაფასა სახალხო დამცველის მოადგილე გიორგი ბურჯანაძემ სახელმწიფო ინსპექტორის სამსახურის გაუქმების შესახებ გადაწყვეტილება.

როგორც მან პარლამენტის საპროცედურო საკითხთა კომისიის სხდომაზე განაცხადა, ამ ინსტიტუტის გაუქმება დაუსაბუთებელია და მას ახსნა არ გააჩნია.

„არანაირი ლოგიკა და ახსნა არ აქვს იმას, რაც აქ კეთდება, ეს არის კლასიკური არაკონსტიტუციური კანონმდებლობა. ეს არის კანონმდებლობა, რომელიც ადამიანის უფლებებს არღვევს. მერწმუნეთ, ამ გადაწყვეტილებით ისტორიაში შეხვალთ, ოღონდ ეს ისტორიის კარგი მხარე არ იქნება, ამას დანანებით ვამბობ“,-განაცხადა ბურჯანაძემ.

მისი თქმით, სახალხო დამცველი თავის ანგარიშებში ყოველთვის აღნიშნავდა სახელმწიფო ინსპექტორის სამსახურის საქმიანობის ეფექტურობის შესახებ.

„მიუხედავად იმისა, რომ უამრავი სირთულე ჰქონდა, ამ სამსახურმა 2019 წლის 1-ელი ნოემბრის შემდეგ შეუძლებელი შეძლო. არაერთხელ მქონია შემთხვევა, როცა ღამის 3-4 საათზე, ეს სამსახური მობილური იყო და თავის საქმიანობას ახორციელებდა, რათა მტკიცებულბები არ განადგურებულიყო. 2 წლის განმავლობაში ამ სამსახურზე ცუდის მთქმელი, შიგნით თუ გარეთ, სამთავრობო თუ არასამთავრობო, ოპოზიციური თუ არაოპოზიციური მიმართულებით, არ მინახავს. მცირე ხარვეზი და უკმაყოფილება შეიძლება ვიღაცას ჰქონდა, მაგრამ ამ სამსახურის საქმიანობა ყველას მხრიდან სანიმუშო იყო“,-განაცხადა ბურჯანაძემ.

მისი განმარტებით, ეს გადაწყვეტილება ყველასთვის მოულოდნელი აღმოჩნდა.

„შაბათს, საღამოს „ინტერპრესნიუსისგან“ შემთხვევით ვიგებთ იმას, რომ, ასეთი სანიმუშო, ხელით საჩვენებელი სამსახური უქმდება, მოწმენილ ცაზე მეხის გავარდნას ჰგავდა, სრულიად გამაოგნენებელი იყო. ალბათ, კანონპროექტის განმარტებით ბარათში ერთი სიტყვაც კი არ არის ნახსენები იმაზე, ეს სამსახური რას ვერ აკეთებდა“,-განაცხადა ბურჯანაძემ.

ცნობისთვის, სახელმწიფო ინსპექტორის სამსახური და სახელმწიფო ინსპექტორის თანამდებობა 2022 წლის 1-ელი მარტიდან გაუქმდება. პარლამენტში წარდგენილი საკანონმდებლო პაკეტის მიხედვით, 2022 წლის 1-ელი მარტიდან თანამდებობებიდან თავისუფლდება როგორც სახელმწიფო ინსპექტორი, ასევე მისი პირველი მოადგილე და მოადგილეები.

წყარო:ინტერპრეს ნიუსი