ჯარიმისა და საურავის ჩამოწერა, მიწისქვეშა მტკნარი წყლების ჩამოსხმისთვის გათვალისწინებული გადაუხდელი მოსაკრებლის

საქართველოს საგადასახადო კოდექსის 309-ე მუხლის 145-ე ნაწილის შესაბამისად, მიღებულ იქნა საქართველოს მთავრობის 2024 წლის 14 ივნისის N194 დადგენილება, რომლითაც დამტკიცდა მიწისქვეშა მტკნარი წყლების ჩამოსხმისთვის გათვალისწინებული გადაუხდელი მოსაკრებლის, ჯარიმისა და საურავის ჩამოწერის წესი.

საქართველოს საგადასახადო კოდექსის 309-ე მუხლის 144-ე ნაწილის მიხედვით, პირს ჩამოეწერება მიწისქვეშა მტკნარი წყლების ჩამოსხმის მიზნით გამოყენებისთვის გათვალისწინებული მოსაკრებლის გადაუხდელი ოდენობა და მასთან დაკავშირებული გადაუხდელი ჯარიმა და საურავი, თუ პირს 2023 წლის 1 დეკემბრამდე შესაბამისი ლიცენზიით არ უსარგებლია, კერძოდ მიწისქვეშა მტკნარი წყალი არ ჩამოუსხამს და ამასთან კმაყოფილდება ერთ-ერთი შემდეგი პირობა:

• პირი, 2023 წლის 1 დეკემბრის მდგომარეობით, აღარ ფლობს მიწისქვეშა მტკნარი წყლების ჩამოსხმისთვის გაცემულ ლიცენზიას;

• პირმა 2024 წლის 1 აპრილამდე მიწისქვეშა მტკნარი წყლების ჩამოსხმისთვის ლიცენზიის გამცემ ორგანოს მიმართა ამ ლიცენზიის გაუქმების შესახებ და 2023 წლის 1 დეკემბრიდან 2024 წლის 1 აპრილის ჩათვლით არ უსარგებლია აღნიშნული ლიცენზიით, კერძოდ, არ ჩამოუსხამს მიწისქვეშა მტკნარი წყალი.

ზემოაღნიშნული წესის თანახმად, პირი საგადასახადო ორგანოს წარუდგენს განცხადებას, რომელშიც ასახულ უნდა იქნას შემდეგი მონაცემები:

• პირის და­სა­ხე­ლე­ბა, სა­იდ­ენ­ტი­ფი­კა­ციო ნო­მერი ან სახელი, გვარი და პი­რადი ნო­მერი, ასევე იურ­იდ­ი­ული/ფაქ­ტობ­რივი მი­სა­მართი და ტელე­ფო­ნის ნომერი;
• მტკნარი წყლების ჩამოსხმისთვის გაცემული ლიცენზიის (რომლის საფუძველზეც წარმოშობილია მოსაკრებელი და მასთან დაკავშირებული ჯარიმა და საურავი) ნომერი და გაცემის თარიღი;
• პირის მიერ საგადასახადო ორგანოსთვის განცხადების წარდგენის თარიღის მდგომარეობით არსებული გადაუხდელი მოსაკრებლის, ჯარიმისა და საურავის ოდენობა, რომელიც წარმოიშვა იმ ლიცენზიის საფუძველზე, რომლითაც გადამხდელს არ უსარგებლია, მტკნარი წყლის ჩამოსხმა არ განხორციელებულა.
  

პირველი პირობის შემთხვევაში, განცხადებას თან უნდა ერთოდეს უფლებამოსილი ორგანოს გადაწყვეტილება ლიცენზიის გაუქმების შესახებ/ლიცენზიის გადაცემის დამადასტურებელი დოკუმენტი ან სხვა დოკუმენტი, რომლითაც დასტურდება, რომ პირი, 2023 წლის 1 დეკემბრის მდგომარეობით, აღარ ფლობს მიწისქვეშა მტკნარი წყლების ჩამოსხმისთვის გაცემულ ლიცენზიას.

მეორე პირობის შემთხვევაში, განცხადებას თან უნდა ერთოდეს ლიცენზიის გამცემი ორგანოსათვის წარდგენილი შესაბამისი განცხადება.

განცხადების წარდგენა შესაძლებელია შემოსავლების სამსახურის ავტორიზებული მომხმარებლის გვერდიდან https://eservices.rs.ge კომუნიკატორის მეშვეობით, ასევე მატერიალური ფორმით.

წყარო: შემოსავლების სამსახური