ბულგარეთმა ქართველი მეზღვაურების სერტიფიკატები აღიარა

ბულგარეთმა სანაპირო ნაოსნობაში ჩართული ქართველი მეზღვაურების სერტიფიკატები აღიარა - შესაბამისი მემორანდუმი სოფიაში გაფორმდა, რომელსაც ხელი მოაწერეს საქართველოს საზღვაო ტრანსპორტის სააგენტოს დირექტორმა ალექსი ახვლედიანმა და ბულგარეთის რესპუბლიკის აღმასრულებელი სააგენტოს საზღვაო ადმინისტრაციის აღმასრულებელმა დირექტორმა ვენცისლავ ივანოვმა.

მემორანდუმზე ხელმოწერა საქართველოს ეკონომიკისა და მდგრადი განვითარების მინისტრის მოადგილის, გურამ გურამიშვილის ბულგარეთში სამუშაო ვიზიტის ფარგლებში შედგა.

მინისტრის მოადგილის შეფასებით, სანაპირო ნაოსნობაში ჩართული მეზღვაურების სერტიფიკატების ურთიერთაღიარება ძალიან მნიშვნელოვანია ქართველი მეზღვაურების საქმიანობის მხარდასაჭერად. მნიშვნელოვანია, რომ სანაპირო ნაოსნობაში ჩართული ქართველი მეზღვაურების სერტიფიკატებს უკვე შავი ზღვის ოთხი ქვეყანა: თურქეთი, რუმინეთი, უკრაინა და ბულგარეთი აღიარებს, რაც ზრდის ქართველი მეზღვაურების დასაქმების შესაძლებლობებსა და არეალს შავი ზღვის რეგიონში.

მემორანდუმის ხელმოწერამდე ქართულმა დელეგაციამ მინისტრის მოადგილის ხელმძღვანელობით შეხვედრა გამართა ბულგარეთის რესპუბლიკის ტრანსპორტისა და კომუნიკაციების სამინისტროში, სადაც მხარეებმა ორ ქვეყანას შორის საზღვაო სექტორში მიმდინარე პროექტები და სამომავლო თანამშრომლობის გაღრმავების შესაძლებლობები განიხილეს.

როგორც შეხვედრაზე აღინიშნა, ორივე ქვეყნისთვის მნიშვნელოვანია აქტიური თანამშრომლობა საზღვაო განათლების, წვრთნისა და სერტიფიცირების მიმართულებით, ასევე, შავი ზღვის რეგიონში პირდაპირი საზღვაო გადაზიდვების, მათ შორის საბორნე მიმოსვლის განვითარების კუთხით.

სოფიაში სამუშაო ვიზიტის ფარგლებში გურამ გურამიშვილისა და ბულგარეთის ტრანსპორტისა და კომუნიკაციების მინისტრის მოადგილის, ანნა მიჰნევა ნატოვას პირისპირ შეხვედრა გაიმართა, სადაც ორი ქვეყნის პრიორიტეტული საკითხები განიხილეს, მათ შორის სახმელეთო, საზღვაო და სარკინიგზო ტრანსპორტის სფეროებში.

„შავ ზღვაზე დაკავშირებადობა არის ძალიან მნიშვნელოვანი საქართველოსთვის - ჩვენ ქვეყანას აქვს საზღვაო საზღვარი ბულგარეთთან და ინტენსიფიკაცია ტვირთების გადაზიდვისთვის და დაკავშირებადობის გაუმჯობესება არის მნიშვნელოვანი ფაქტორი შუა დერეფნის განვითარებისთვის. ამ და სხვა მნიშვნელოვან საკითხებზე ვისაუბრეთ ჩემს ბულგარელ კოლეგასთან შეხვედრაზე და დავსახეთ კონკრეტული ღონისძიებები, რომლებიც მოიცავს როგორც ინფრასტრუქტურულ, ასევე პროცედურულ კომპონენტებს“- აღნიშნა გურამ გურამიშვილმა.