ნასვამ მდგომარეობაში ავტომობილის მართვაზე სასჯელი გამკაცრდა

ადამიანის უფლებათა დაცვისა და სამოქალაქო ინტეგრაციის კომიტეტმა დაამტკიცა „საქართველოს ადმინისტრაციულ სამართალდარღვევათა კოდექსში" შესატანი ცვლილებები, რომელიც ალკოჰოლური სიმთვრალის მდგომარეობაში სატრანსპორტო საშუალების მართვის შემთხვევაში ადმინისტრაციული ზომების გამკაცრებას ითვალისწინებს.

მნიშვნელოვანი ცვლილებები საქართველოს ადმინისტრაციულ სამართალდარღვევათა კოდექსში:

სატრანსპორტო საშუალების ალკოჰოლური სიმთვრალის მდგომარეობაში მართვა, თუ მძღოლის სისხლში ეთანოლის შემცველობა:

0,3-დან 0,7 (ჩათვლით) პრომილემდეა, გამოიწვევს მართვის უფლების 6 თვით შეჩერებას;

0,7 პრომილეზე მეტია, გამოიწვევს მართვის უფლების 1 წლით შეჩერებას.

ალკოჰოლური სიმთვრალის დასადგენად შემოწმებისათვის თავის არიდება გამოიწვევს მართვის უფლების 1 წლით შეჩერებას.

მართვის უფლების ვადამდე აღდგენის მიზნით საქმის განმხილველი ორგანოსთვის მიმართვის უფლება წარმოიშობა შეჩერების ვადის არანაკლებ ნახევრის (შესაბამისად, 3 ან 6 თვის) გასვლის შემდეგ.

იმ პირის მიერ, რომელსაც დადებული აქვს ზემოაღნიშნულიდან რომელიმე ადმინისტრაციული სახდელი, სატრანსპორტო საშუალების მართვის უფლების შეჩერების პერიოდში სატრანსპორტო საშუალების ალკოჰოლური სიმთვრალის მდგომარეობაში მართვა გამოიწვევს დაჯარიმებას 2 000 ლარით, ადმინისტრაციულ პატიმრობას 5-დან 15 დღემდე ვადით და მართვის უფლების შეჩერების ვადის 1 წლით გაზრდას.

რომელიმე ზემოაღნიშნული ადმინისტრაციული სამართალდარღვევის ჩადენასთან ერთად სატრანსპორტო საშუალების, ტვირთის, გზის, საგზაო ან სხვა ნაგებობის, სხვა ქონების ან ადამიანის ჯანმრთელობის მსუბუქი დაზიანება გამოიწვევს დაჯარიმებას 2 000 ლარის ოდენობით და მართვის უფლების შეჩერებას 3 წლით.

სატრანსპორტო საშუალების მართვა ალკოჰოლური სიმთვრალის მდგომარეობაში, როდესაც მძღოლს არ აქვს სატრანსპორტო საშუალების მართვის უფლება ან მართვის უფლება შეჩერებული აქვს სხვა დარღვევის ჩადენისთვის, გამოიწვევს დაჯარიმებას 2 000 ლარის ოდენობით.

სატრანსპორტო საშუალების ალკოჰოლური სიმთვრალის მდგომარეობაში მართვა იმ პირის მიერ, რომელსაც:

დადებული აქვს ადმინისტრაციული სახდელი სატრანსპორტო საშუალების ალკოჰოლური სიმთვრალის მდგომარეობაში მართვის უფლების გარეშე მართვისათვის, გამოიწვევს დაჯარიმებას 3 000 ლარით და ადმინისტრაციულ პატიმრობას 10-დან 15 დღემდე;

დადებული აქვს ადმინისტრაციული სახდელი სხვა დარღვევის ჩადენის საფუძვლით მართვის უფლების შეჩერების პერიოდში სატრანსპორტო საშუალების ალკოჰოლური სიმთვრალის მდგომარეობაში მართვისათვის, გამოიწვევს დაჯარიმებას 3 000 ლარით, ადმინისტრაციულ პატიმრობას 10-დან 15 დღემდე ვადით და მართვის უფლების შეჩერების ვადის 1 წლით გაზრდას.

არ აქვს სატრანსპორტო საშუალების მართვის უფლება, გამოიწვევს დაჯარიმებას 3 000 ლარით და ადმინისტრაციულ პატიმრობას 10-დან 15 დღემდე;

მართვის უფლება შეჩერებული აქვს სხვა დარღვევისათვის, გამოიწვევს დაჯარიმებას 3 000 ლარით, ადმინისტრაციულ პატიმრობას 10-დან 15 დღემდე ვადით და მართვის უფლების შეჩერების ვადის 3 წლით გახანგრძლივებას.

სატრანსპორტო საშუალების სამართავად გადაცემა წინასწარი შეცნობით:

ალკოჰოლური სიმთვრალის მდგომარეობაში მყოფი პირისთვის დაჯარიმდება 1 500 ლარის ოდენობით;

ნარკოტიკული ან ფსიქოტროპული სიმთვრალის მდგომარეობაში მყოფი პირისათვის დაჯარიმდება 2 000 ლარის ოდენობით.

მოპედის ალკოჰოლური სიმთვრალის მდგომარეობაში მართვა ან ალკოჰოლური სიმთვრალის დასადგენად შემოწმებისთვის თავის არიდება გამოიწვევს დაჯარიმებას 500 ლარის ოდენობით.

მოპედის ნარკოტიკული ან ფსიქოტროპული სიმთვრალის მდგომარეობაში მართვა ან ნარკოტიკული/ფსიქოტროპული სიმთვრალის დასადგენად შემოწმებისთვის თავის არიდება გამოიწვევს დაჯარიმებას 1 500 ლარის ოდენობით.

ახალი კანონი ამოქმედდება გამოქვეყნებიდან (09/09/2021) მე-60 დღეს.

ვრცლად კოდექსში განხორციელებული საკანონმდებლო ცვლილებების შესახებ იხილეთ

https://matsne.gov.ge/ka/document/view/5252532?publication=0&fbclid=IwAR0Vh31n-azha4wIJybCUAjkvAallFnSYBEGcPB184cRz5r3vHhxm2U_hGQ

კონსულტაციისთვის დაგვიკავშირდით