როგორ მიიღებენ უცხოელები საქართველოში მუშაობის უფლებას 2026 წლის 01 მარტიდან - რა უნდა იცოდეთ?

საქართველოში უცხო ქვეყნის მოქალაქეებისთვის მუშაობის წესი იცვლება. მთავრობის მიერ დამტკიცებული ახალი რეგულაცია 2026 წლის 1 მარტიდან შევა ძალაში და შეეხება როგორც დამსაქმებლებს, ისე საქართველოში დასაქმებულ ან თვითდასაქმებულ უცხოელებს.

თუ თქვენ გეგმავთ უცხოელის დასაქმებას ან თავად ხართ უცხო ქვეყნის მოქალაქე და საქმიანობთ საქართველოში, მნიშვნელოვანია წინასწარ იცოდეთ რა მოთხოვნები და ვადებია განსაზღვრული.

ვის შეეხება ახალი რეგულაცია?
ახალი წესები ვრცელდება იმ უცხო ქვეყნის მოქალაქეებზე, რომლებიც:

• არ ფლობენ მუდმივი ბინადრობის ნებართვას;

• გეგმავენ მუშაობას საქართველოში ადგილობრივ დამსაქმებელთან (მათ შორის დისტანციურად);

• ან აპირებენ თვითდასაქმებას და ფინანსური სარგებლის მიღებას.

შრომითი საქმიანობის უფლების გამცემი ორგანო იქნება დასაქმების ხელშეწყობის სახელმწიფო სააგენტო.

როდის ამოქმედდება ცვლილებები?

• 2026 წლის 1 მარტიდან – ძალაში შევა ახალი წესი.

• 2026 წლის 1 მაისიდან – რეგულაცია გავრცელდება უკვე მოქმედ თვითდასაქმებულ უცხოელებზე.

• 2027 წლის 1 იანვრამდე – აქტიური სტატუსის მქონე შრომით იმიგრანტებს ეძლევათ ვადა, მიიღონ შრომითი საქმიანობის უფლება და შესაბამისი ბინადრობის ნებართვა.

გარდამავალი პერიოდი მიზნად ისახავს ბაზარზე არსებული უცხოელი მუშახელის სამართლებრივი სტატუსის მოწესრიგებას.

ვაკანსიის სავალდებულო გამოქვეყნება / ადგილობრივი კადრის პრიორიტეტი

დამსაქმებელს ეკისრება ვალდებულება:

• უცხოელის აყვანამდე მინიმუმ 10 სამუშაო დღით ადრე განათავსოს ვაკანსია პორტალზე: worknet.moh.gov.ge;

• დაელოდოს სააგენტოს რეაგირებას.

თუ 10 სამუშაო დღის განმავლობაში ვერ მოიძებნა შესაბამისი კვალიფიკაციის ადგილობრივი კანდიდატი, მხოლოდ ამის შემდეგ შეუძლია დამსაქმებელს მიმართოს სააგენტოს უცხოელისთვის შრომითი საქმიანობის უფლების მისაღებად.

გამონაკლისები 

ვაკანსიის წინასწარი გამოქვეყნების ვალდებულება არ ვრცელდება:

• საერთაშორისო კომპანიებსა და ინოვაციურ სტარტაპებზე;

• განათლების სფეროში მოწვეულ საერთაშორისო ექსპერტებზე;

• პოზიციებზე, სადაც:

  • დარიცხული ანაზღაურება აღემატება 15 000 ლარს,

  • და სავალდებულოა უმაღლესი განათლება.

თვითდასაქმებული პირები:

• უშუალოდ მიმართავენ სააგენტოს;

• გადიან სავალდებულო ვიდეოგასაუბრებას;

• წარადგენენ საქმიანობასთან დაკავშირებულ დამადასტურებელ დოკუმენტაციას.

2026 წლის 1 მაისიდან უკვე მოქმედი თვითდასაქმებულებიც დაექვემდებარებიან აღსრულების მექანიზმებს.

შრომითი საქმიანობის უფლების ვადები

სტანდარტული ვადა:

• გაიცემა 6 თვიდან 1 წლამდე.

გაგრძელება:

• პირველი 5 წლის განმავლობაში – არაუმეტეს 1 წლით თითოეულ ჯერზე;

• 5 წლის უწყვეტი საქმიანობის შემდეგ – 1-დან 5 წლამდე ვადით.

IT სექტორისთვის სპეციალური რეჟიმი

IT სფეროში დასაქმებულ უცხოელებზე:

• პირველად უფლება შეიძლება გაიცეს 3 წლამდე ვადით;

• შემდგომი გაგრძელება – ასევე მაქსიმუმ 3-წლიანი პერიოდებით.

მომსახურება	საფასური
გადაწყვეტილება 30 კალენდარულ დღეში	200 ლარი
დაჩქარებული წესი (10 სამუშაო დღე)	400 ლარი
ვადის გაგრძელება	200 ლარი

შრომითი იმიგრანტის შემთხვევაში საფასურს იხდის დამსაქმებელი;

თვითდასაქმებულის შემთხვევაში  უცხო ქვეყნის მოქალაქე.

მონიტორინგი და პასუხისმგებლობა

სააგენტო განახორციელებს კონტროლს. დარღვევის შემთხვევაში შესაძლებელია შრომითი საქმიანობის უფლების შეწყვეტა, მათ შორის თუ:

• უცხოელი მუშაობს სხვა პოზიციაზე;

• არ ახორციელებს საქმიანობას მითითებულ ადგილას;

• დაირღვა ვიზისა ან ბინადრობის რეჟიმი.

ზედამხედველობას ასევე განახორციელებენ შრომის ინსპექცია და შინაგან საქმეთა სამინისტრო.

შრომითი ხელშეკრულების შეწყვეტა, რა ვალდებულება აქვს დამსაქმებელს?

თუ ხელშეკრულება ვადაზე ადრე შეწყდება, დამსაქმებელი ვალდებულია:

• 5 კალენდარული დღის ვადაში აცნობოს სააგენტოს.

შეწყვეტის საფუძვლები შეიძლება იყოს:

• ხელშეკრულების ვადის გასვლა;

• სხვა პოზიციაზე დასაქმება;

• ვიზისა ან ბინადრობის ნებართვის ვადის ამოწურვა;

• უარყოფითი გადაწყვეტილება;

• გაძევება;

• ქვეყნის დატოვება 6 თვეზე მეტი ვადით.

ვადის გაგრძელება როგორ ხდება?

უცხოელმა უნდა მიმართოს სააგენტოს:

• არაუგვიანეს ვადის ამოწურვამდე 30 კალენდარული დღით ადრე;

• განაახლოს ყველა შესაბამისი მონაცემი.

გადაწყვეტილება იგზავნება ელექტრონულად 30 კალენდარული დღის ვადაში.

ვიზა და ბინადრობის ნებართვა: თუ შრომითი იმიგრანტი საქართველოში არ იმყოფება:

• 30 კალენდარულ დღეში უნდა მიმართოს საელჩოს D1 კატეგორიის ვიზისთვის.

თუ უკვე საქართველოშია:

• 10 კალენდარულ დღეში უნდა მიმართოს სახელმწიფო სერვისების განვითარების სააგენტოს
  შრომითი ბინადრობის ნებართვის ან IT ნებართვის მისაღებად.

ეს ვალდებულება არ ვრცელდება იმ პირებზე, რომლებიც უკვე ფლობენ შესაბამის ბინადრობის ნებართვას ან საქმიანობას სრულად დისტანციურად ახორციელებენ.

ვის არ ეხება რეგულაცია? ახალი წესები არ ვრცელდება:

• ლტოლვილის ან ჰუმანიტარული სტატუსის მქონე პირებზე;

• თავშესაფრის მაძიებლებზე;

• დიპლომატებსა და საერთაშორისო ორგანიზაციების თანამშრომლებზე;

• აკრედიტებულ ჟურნალისტებზე;

• საინვესტიციო ბინადრობის ნებართვის მქონე პირებზე.

2026 წლიდან უცხოელთა დასაქმება საქართველოში გადადის უფრო სტრუქტურირებულ და კონტროლირებად სისტემაზე. ცვლილებები ემსახურება შრომის ბაზრის დაცვას, ადგილობრივი კადრების პრიორიტეტს და უცხოელთა საქმიანობის სამართლებრივ მოწესრიგებას.

დამსაქმებლებმა და უცხო ქვეყნის მოქალაქეებმა წინასწარ უნდა დაგეგმონ პროცედურები, გაითვალისწინონ ვადები და უზრუნველყონ დოკუმენტაციის სრულყოფილება, რათა თავიდან აიცილონ სანქციები და საქმიანობის შეჩერება.

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები