ცივი იარაღის ტარება და სისხლისსამართლებრივი პასუხისმგებლობა საქართველოში

ცივი იარაღის ტარება და სისხლისსამართლებრივი პასუხისმგებლობა საქართველოში
ავტორი: ადვოკატი ნათია ნაკაშიძე ადმინისტრაციულ, სამოქალაქო საქმეებსა და ბავშვთა უფლებებში სპეციალიზებული ადვოკატი.

ცივი იარაღის ტარება საქართველოში მკაცრად რეგულირებულია. კანონმდებლობა განსაზღვრავს იმ შემთხვევებს, როცა მსგავსი ქმედება შეიძლება გახდეს ადმინისტრაციული ან სისხლისსამართლებრივი პასუხისმგებლობის საფუძველი.

კანონის თანახმად, ცივი იარაღის ტარება, როდესაც იგი იწვევს საჯარო წესრიგის დარღვევას ან ქმნის აშკარა საფრთხეს, წარმოადგენს სამართალდარღვევას, რომლისთვისაც გათვალისწინებულია შესაბამისი სანქციები.

რა ითვლება ცივი იარაღის ტარებად? - კოდექსის განმარტებით, ცივი იარაღის ტარება გულისხმობს ისეთ გარემოებას, როდესაც პირს თან აქვს ცივი იარაღი , უჭირავს ხელში, მიმაგრებული აქვს სხეულზე ან ინახავს ტანსაცმელში.
ეს არ ნიშნავს მხოლოდ გამოყენების ფაქტს - საკმარისია, იარაღი უბრალოდ თან ჰქონდეს პირს.

ვის ეკრძალება ცივი იარაღის ტარება? კანონმდებლობით გათვალისწინებულია კატეგორიები, რომელთათვისაც ცივი იარაღის ტარება განსაკუთრებით დასჯადია:

1. ის პირი, რომელიც უკვე იყო ადმინისტრაციულად დასჯილი ცივი იარაღის ტარების ან ნარკოტიკების მოხმარებისათვის;

2. პირი, რომლის მიმართაც გამოცემულია დამცავი ან შემაკავებელი ორდერი;

3. პირი, რომელიც ნასამართლევია განზრახი ნაკლებად მძიმე დანაშაულისთვის.

ასეთი ქმედება ისჯება ჯარიმით, შინაპატიმრობით (6 თვიდან 2 წლამდე) ან თავისუფლების აღკვეთით 6 თვემდე.

მძიმე ან განსაკუთრებით მძიმე დანაშაულისთვის ნასამართლევი პირის მიერ ცივი იარაღის ტარება კი ისჯება სისხლისსამართლებრივად - ჯარიმით ან თავისუფლების აღკვეთით 3 წლამდე ვადით.

არსებობს შემთხვევები, როდესაც ცივი იარაღის ტარება არ არის სამართალდარღვევა, მათ შორის:

• პირადი ჰიგიენის მიზნით (მაგალითად, საპარსი დანის ტარება);

• პროფესიული საქმიანობის გამო (მეტალურგი, ხელოსანი, სამზარეულოს პერსონალი და სხვა);

• ნადირობის, თევზაობის ან მცენარეული პროდუქტების შეგროვებისას;

• სასოფლო-სამეურნეო ან მესაქონლეობის საქმიანობისას;

• ეროვნული ტანსაცმლის ტარებისას, როცა იარაღი ტანსაცმლის ატრიბუტია (მაგ. ხანჯალი).

ადვოკატი ნათია ნაკაშიძე აღნიშნავს:

„ცივი იარაღის ტარების შემთხვევებში ხშირად ხდება სამართალდარღვევის არასწორი კვალიფიკაცია. ამიტომ მოქალაქეებმა უნდა იცოდნენ, რომ გამონაკლისის გამოყენება მხოლოდ მაშინ არის შესაძლებელი, როცა არსებობს კანონით დადგენილი კონკრეტული საფუძველი. წინააღმდეგ შემთხვევაში, ეს ქმედება შეიძლება შეფასდეს როგორც დანაშაული, რაც იწვევს თავისუფლების შეზღუდვას.

ცივი იარაღის ტარება საქართველოს კანონმდებლობის მიხედვით შეიძლება გახდეს როგორც ადმინისტრაციული, ისე სისხლისსამართლებრივი პასუხისმგებლობის საფუძველი. სამართლებრივი ცოდნა და სიფრთხილე არის მთავარი ინსტრუმენტი იმისთვის, რომ მოქალაქეებმა აირიდონ არასასურველი სამართლებრივი შედეგები.