სახელისა და გვარის შეცვლა საქართველოში, საფასური და ვადები

1. ვის შეუძლია სახელისა და გვარის შეცვლა საქართველოში?

✔️ საქართველოს მოქალაქეს;

✔️ საქართველოში სტატუსის მქონე მოქალაქეობის არმქონე პირს, რომლის დაბადება რეგისტრირებულია საქართველოში;

2. რა შემთხვევაში შეუძლია პირს შეიცვალოს სახელი?

✔️ სახელის შეცვლა შესაძლებელია დაინტერესებული პირის სურვილისამებრ.

სრულწლოვან პირს უფლება აქვს შეიცვალოს სახელი მხოლოდ ერთხელ.

სახელის შეცვლა დაუშვებელია, თუ განმცხადებელი სახელად ირჩევს სიმბოლოებს, უცენზურო ან შეურაცხმყოფელ სიტყვებს ან მრავალწევრიან (ორზე მეტი სახელისაგან შემდგარ) სახელს.

3. რა შემთხვევაში შეუძლია პირს შეიცვალოს გვარი და მიიღოს:

✔️ მშობელთა შეერთებული გვარი;

✔️ პირდაპირი აღმავალი შტოს ნათესავის გვარი (მეოთხე თაობის ჩათვლით);

✔️ საკუთარი გვარისა და პირდაპირი აღმავალი შტოს ერთ-ერთი ნათესავის გვარის გაერთიანების შედეგად მიღებული გვარი;

✔️ ფაქტობრივი აღმზრდელის გვარი;

✔️ მშვილებლის გვარი;

✔️ ქორწინებამდელი გვარი, თუ ქორწინების შეწყვეტისას მას არ დაუბრუნებია ეს გვარი;

ასევე, დაინტერესებულ პირს შეუძლია:

✔️ აღიდგინოს ისტორიული გვარი;

✔️ მოახდინოს მისი გვარის კანონიერად აღიარება;

✔️ დაიდგინოს გვარი.

გაითვალისწინეთ!!!

სახელისა თუ გვარის შეცვლის შემდეგ, პირს მონაცემი ეცვლება, ხოლო დაბადების რეგისტრაციის მომენტიდან მისთვის მინიჭებული პირადი ნომერი, უცვლელი რჩება.

გვარის შეცვლის გარკვეული საფუძვლების შემთხვევაში სრულწლოვან პირს შეუძლია გვარი შეიცვალოს მხოლოდ ერთხელ.

პირებზე , რომლებმაც 2017 წლის 28 მარტის შემდგომ შეიცვალეს გვარი, ვრცელდება ახალი კანონით დადგენილი გვარის შეცვლის რაოდენობრივი შეზღუდვა, შესაბამისი საფუძვლით გვარის შეცვლის მოთხოვნის შემთხვევაში.

4. მომსახურების ვადა და საფასური

✔️ სახელის ან/და გვარის შეცვლა ხორციელდება განცხადების წარდგენიდან მე-60 კალენდარულ დღეს.

✔️ მომსახურების საფასურია - 75 ლარი;

✔️ დაუშვებელია სახელის ან/და გვარის შეცვლა დაჩქარებული წესით.

სახელის ან/და გვარის შეცვლის შემთხვევაში, თქვენ ვალდებული ხართ შეცვალოთ პირადობის დამადასტურებელი დოკუმენტები.

ასევე დაუშვებელია სახელისა და გვარის შეცვლა, თუ:

✔️ თუ ეს პირი დანაშაულის ჩადენაშია ეჭვმიტანილი და იძებნება საქართველოს სამართალდამცავი ორგანოების მიერ.

✔️ განხორციელდა დაინტერესებული პირის დეპორტაცია ან რეადმისია საქართველოში და დეპორტაციის/რეადმისიის განხორციელებიდან 5 წელი არ გასულა;

✔️ დაინტერესებული პირის წინააღმდეგ მიმდინარეობს სისხლისსამართლებრივი დევნა, მათ შორის, თუ ეს პირი იძებნება საქართველოს ან სხვა სახელმწიფოს სამართალდამცავი ორგანოების ან საერთაშორისო კრიმინალური პოლიციის ორგანიზაციის (ინტერპოლის) მიერ, ამ გარემოების აღმოფხვრამდე.

✔️ 16 წელს მიღწეული პირის განცხადება სააგენტოს შესაბამისი ტერიტორიული სამსახურისთვის ან საზღვარგარეთ საქართველოს დიპლომატიური წარმომადგენლობისთვის ან საკონსულო დაწესებულებისთვის დაინტერესებულ პირს უშუალოდ არ წარუდგენია და მასზე არ ვრცელდება კანონით დადგენილი შეღავათი;