ალექსანდრე რაქვიაშვილი აზარტული თამაშების რეგულირებაზე

აზარტული თამაშების რეგულირების კანონპროექტის განხილვას პარლამენტი კომიტეტებში მიმდინარე კვირიდან დაიწყებს. მთავრობა ცვლილებათა პაკეტის დაჩქარებული წესით განხილვას მოითხოვს, რასაც ბიუროს სხდომაზე მხარი უკვე დაუჭირეს.

ოპოზიციის წარმომადგენლები კანონპროექტს მხარს არ დაუჭერენ, რადგან ინიციატივას მმართველი გუნდის მხრიდან ყურადღების გადატანის მცდელობად აფასებენ.

პარლამენტის პოლიტიკური ჯგუფის "გირჩის" წევრი ალექსანდრე რაქვიაშვილი ამბობს, რომ ეს კანონპროექტი აზარტდამოკიდებულოებას ვერ მოაგვარებს.

"ეს კანონი გაუგებარი და მიუღებელია ეს ვერ მოაგვარებს იმ პრობლემას, რომელზეც გვაქვს პრეტენზია - ლუდომანიას და ა.შ. ყველა მოთამაშეს ექნება თავისუფალი წვდომა ამ საიტებზე, რაც არ უნდა დაბლოკონ. ჩვენ დავკარგავთ ინვესტიციებს, დავკარგავთ სამუშაო ადგილებს. მე არ მომწონს ეს კანონი და არც მხარს დავუჭერ,"- აცხადებს ალექსანდრე რაქვიაშვილი.

პარლამენტის დეპუტატის, პარტია "სტრატეგია აღმაშენებელის" წევრის თეონა აქუბარდიას თქმით კი, კანონპროექტი არ არის მიმართული ლუდომანიის წინააღმდეგ.

"დაჩქარებული სახით ამ კანონპოექტის გამოტანას, როდესაც არანაირი საჯარო განხილვა და დისკუსია არ ყოფილა და დეტალურად ამის შეფასება არ მომხდარა არ ვფიქრობ, რომ ამ მომენტისთვის ეს ლუდომანიის წინააღმდეგ არის მიმართული. დიდი ხანია ეს პრობლემა საქართველოში არის და ვფიქრობ, რომ ეს ყურადღების გადატანას ემსახურება ხელისუფლების მხრიდან,"- ამბობს თეონა აქუბარდია.

აზარტული თამაშების აკრძალვასთან დაკავშირებით ოპონენტებისგან განსხვავებული მოსაზრებაა აქვთ მმართველ გუნდში. "ქართული ოცნების" წევრები ფიქრობენ, რომ ოპოზიციასთან ერთად ისეთი ალტერნატიული ვარიანტი უნდა შემუშავდეს, რომელიც შეამცირებს აზარტდამოკიდებულებას ახალგაზრდებში და პარალელურად ბიუჯეტზე უარყოფითად არ აისახება.

"რა საკვირველია ამ თემებთან დაკავშირებით უნდა გვქონდეს მსჯელობა. შეიძლება ცხარე მსჯელობაც იყოს, მაგრამ ოპოზიცია ვალდებულია თავის პოზიცია წარმოადგინოს და დაასაბუთოს. ვფიქრობ ისეთი ოპტიმალური ვარიანტი უნდა ვიპოვოთ, რომელიც ბიუჯეტის შემოსავალს არ დაეტყობა, მაგრამ საგანგებოდ მნიშვნელოვანი იქნება ისეთი ფორმულის შემოტანა რომელიც პრობლემას მოაგვარებს,"- აცხადებს გიორგი ვოლსკი.

წყარო:rustavi2.ge