ადმინისტრაციული საჩივრის გადაწყვეტილების ჩაბარების წესი იცვლება - რა ახალ რეგულაციას აანონსებს კახა კალაძე

თბილისის მერმა, კახა კალაძემ, დედაქალაქის მთავრობის სხდომაზე მნიშვნელოვანი სიახლე წარადგინა, რომელიც ადმინისტრაციული საჩივრების განხილვის პროცესს შეეხება. ცვლილება მიმართულია იმ პრაქტიკის აღმოსაფხვრელად, როდესაც მოქალაქეები განზრახ არ იღებენ მათ მიმართ გამოტანილ ადმინისტრაციულ გადაწყვეტილებებს, რაც საბოლოოდ ჯარიმების აღსრულებას წლების განმავლობაში აჭიანურებს.

კალაძის განცხადებით, ხშირია შემთხვევები, როდესაც შესაბამისი სამსახური ჯარიმის ჩასაბარებლად მიდის, თუმცა ობიექტის მფლობელი ან პასუხისმგებელი პირი შეგნებულად არ იღებს დოკუმენტს. ამგვარი ქცევა ხელს უშლის ადმინისტრაციული სამართალდარღვევის პროცესის დასრულებას და აძლიერებს დაუსჯელობის განცდას.

„მხოლოდ ჯარიმების გადიდება ან სასჯელის გამკაცრება ვერასდროს იქნება ეფექტური, თუ სამართალდარღვევის გამოვლენიდან მის აღსრულებამდე მექანიზმი სრულად არ მუშაობს. დღეს გვაქვს სიტუაცია, როცა მოქალაქე ან მეწარმე, რომელიც არ იბარებს საჩივრის ფარგლებში მიღებულ გადაწყვეტილებას, პრაქტიკულად თავს არიდებს პასუხისმგებლობას,“ აღნიშნა თბილისის მერმა.

რა შეიცვლება ახალი რეგულაციის შემთხვევაში?

კანონპროექტის მიხედვით, თუ მოქალაქე ადმინისტრაციული საჩივრის განხილვის შედეგად მიღებულ გადაწყვეტილებას დადგენილი წესით არ ჩაიბარებს, გადაწყვეტილება განთავსდება მუნიციპალიტეტის ოფიციალურ ვებგვერდზე.

მის გამოქვეყნებიდან 30 დღის გასვლის შემდეგ, იგი ავტომატურად ჩაითვლება ჩაბარებულად, რაც მერიას შესაძლებლობას მისცემს ჯარიმა ან სხვა სანქცია დროულად აღასრულოს.

კალაძის განმარტებით, ეს ცვლილება უზრუნველყოფს პროცესის გამჭვირვალობას და გამორიცხავს იმ შემთხვევებს, როცა გადაწყვეტილება წლების განმავლობაში „ჰაერში“ რჩება და სამართალდამრღვევი პასუხისმგებლობას არ ეკისრება.

„ეს არის სამართლიანობის აღდგენის და გამართული მართვისკენ გადადგმული ნაბიჯი. მას შემდეგ, რაც გადაწყვეტილება ჩაბარებულად ჩაითვლება, მუნიციპალიტეტს ექნება სამართლებრივი საფუძველი, რომ ბოლომდე მიიყვანოს აღსრულების პროცესი - თუ, რა თქმა უნდა, მოქალაქე გადაწყვეტს სასამართლოს მიმართოს, ეს უკვე მისი უფლებაა,“ აღნიშნა კალაძემ.

ახალი მიდგომა თბილისის მერის თქმით, არა მხოლოდ ადმინისტრაციული სამართალდარღვევების სამართლიანად მოგვარებას შეუწყობს ხელს, არამედ ზოგადი ადმინისტრაციული ეფექტიანობის ზრდის წინაპირობასაც შექმნის.

სრულად თბილისის მთავრობის სხდომა 19.11.2025 წელი იხილეთ მოცემულ ბმულზე

კონსულტაციისთვის დაგვიკავშირდით

საქართველოში 598 419 416  
თბილისი, ალ.ყაზბეგის №47 (მეტრო დელისი)
თბილისი, გურამიშვილის N23 ა (მეტრო ღრმაღელე)

იტალიაში ქართველი ოპერატორი 351 5 47 00 47  
Italia, Bari, Piazza Nicola Balenzano, 12 A

გაზიარება

Facebook კომენტარები