კალაძე ავარიულიდან ახალ კორპუსში ხალხის გასახლების წესებს განმარტავს

თბილისის მერმა, კახა კალაძემ დედაქალაქის მთავრობის სხდომაზე ავარიული მრავალბინიანი საცხოვრებელი სახლების ჩანაცვლების ახალ წესზე განმარტება გააკეთა.

მისი თქმით, ცვლილება მდგომარეობს იმაში, რომ მუნიციპალიტეტს საკუთარ ტერიტორიაზე ახალი კორპუსის მშენებლობისთვის მოსახლეობის ნებართვა არ სჭირდება, თუმცა როდესაც ავარიულ კორპუსებში მცხოვრებლებს ამ ახალ კორპუსში გადასვლას შესთავაზებენ, მათი თანხმობა აუცილებელი იქნება.

„ცვლილება ეხება იმ შემთხვევას, როდესაც მუნიციპალიტეტი ავარიული სახლის ჩანაცვლებას ახორციელებს არა იმავე ტერიტორიაზე, რაზეც დგას ავარიული სახლი, არამედ სხვა მუნიციპალურ მიწის ნაკვეთზე. ცარიელ მიწის ნაკვეთზე მუნიციპალიტეტი კორპუსს აშენებს მოსახლეობის თანხმობის გარეშე იმიტომ, რომ ეს არის ჩვენი საკუთრება და ავარიულ სახლებში მცხოვრებლებს არ ეხება. ეს არის ჩვენი ტერიტორია და არ გვჭირდება თანხმობა. როდესაც კორპუსს ავაშენებთ, შემდეგ შევთავაზებთ გადასვლას უკვე ახალ აშენებულ სივრცეში. ამ მიზნით გავიტანეთ ცვლილებები საკრებულოში.

იმისთვის, რომ შემდგომში მოსახლეობა ავარიული კორპუსიდან ახალაშენებულ კორპუსში გადავიყვანოთ, ცხადია მათი სრული თანხმობა გვჭირდება და თანხმობის გარეშე ვერანაირ გაცვლას ვერ გავაკეთებთ. თუ ეს ხალხი არ იქნება თანახმა, ბინებს შევთავაზებთ სხვა კორპუსში მცხოვრებლებს. როგორ წარმოგიდგენიათ, მოსახლე მისი კუთვნილი ფართიდან გამოვიყვანოთ დაძალებით?“ - თქვა კახა კალაძემ.