დიასპორისა და კავკასიის საკითხთა კომიტეტის სხდომაზე საქართველოს მოქალაქეობის შენარჩუნებისა და აღდგენის მოთხოვნის დროებითი უფლებით სარგებლობის თაობაზე ინფორმაცია მოისმინეს.

პარლამენტის დიასპორისა და კავკასიის საკითხთა კომიტეტის სხდომაზე საქართველოს მოქალაქეობის შენარჩუნებისა და აღდგენის მოთხოვნის დროებითი უფლებით სარგებლობის თაობაზე ინფორმაცია მოისმინეს.

მომხსენებელმა, სახელმწიფო სერვისების განვითარების სააგენტოს თავმჯდომარე რუსუდან კოხოძემ აღნიშნული მიმართულებით სააგენტოს მიერ გადადგმულ ნაბიჯებზე გაამახვილა ყურადღება. მისი თქმით, საქართველოს მოქალაქეობის შენარჩუნებისა და აღდგენის მოთხოვნის დროებითი უფლებით სარგებლობის საკითხი 2018 წელს საქართველოს მოქალაქეობის შესახებ კანონის შესული ცვლილებებით ახლებურად დარეგულირდა.

„პირებს, რომელთა მიმართაც 2018 წლის 15 აგვისტომდე არ ყოფილა გადაწყვეტილება მიღებული სხვა ქვეყნის მოქალაქეობის მოპოვების გამო საქართველოს მოქალაქეობის დაკარგვის შესახებ, მიეცათ დამატებითი შესაძლებლობა მიმართონ სააგენტოს საქართველოს მოქალაქეობის შენარჩუნების მოთხოვნით, ან ყოფილ მოქალაქეებს, რომლებმაც უცხო ქვეყნის მოქალაქეობის მოპოვების გამო დაკარგეს საქართველოს მოქალაქეობა შეუძლიათ ისარგებლონ საქართველოს მოქალაქეობის აღდგენის მოთხოვნის დროებითი უფლებით“, - განაცხადა რუსუდან კოხოძემ.

მისივე თქმით, 2018 წელს კანონში გაჩენილი ეს შესაძლებლობა დღემდე აქტუალურია, რასაც მოწმობს პირთა დიდი ინტერესი და მიმართვიანობის მაღალი მაჩვენებელი. მომხსენებლის ინფორმაციით, აღსანიშნავია, რომ განსაზღვრული მიმართვის ვადა რამდენჯერმე გახანგრძლივდა.

როგორც მომხსენებელმა აღნიშნა, თანამემამულეებისთვის სერვისის კიდევ უფრო ხელმისაწვდომობის კუთხით სააგენტოში დისტანციური მომსახურების სერვისი მოქმედებს, რომელიც საშუალებას აძლევს დაინტერესებულ პირებს ონლაინ, ელექტრონული კომუნიკაციის საშუალებით გააკეთონ განცხადება მათთვის სასურველი სერვისის მისაღებად.

რუსუდან კოხოძემ კანონმდებლებს სტატისტიკური მონაცემები გააცნო და აღნიშნა, რომ საქართველოს მოქალაქეობის შენარჩუნებისა და აღდგენის დროებითი უფლებით სარგებლობის მაჩვენებლები 2018 წლიდან დღემდე სტაბილურად მზარდია.

როგორც დიასპორისა და კავკასიის საკითხთა კომიტეტის თავმჯდომარემ ირაკლი ზარქუამ სხდომაზე განაცხადა, უცხოეთში მცხოვრები საქართველოს მოქალაქეებისა და თანამემამულეებისთვის სახელმწიფო სერვისებით სარგებლობის გამარტივებისთვის, კომიტეტი აქტიურად გააგრძელებს სააგენტოსთან და შესაბამის სტრუქტურულ ერთეულებთან თანამშრომლობას.