საქართველოს ადვოკატთა ასოციაციის თავმჯდომარის, დავით ასათიანის და საქართველოს პრემიერ-მინისტრის, ირაკლი კობახიძის შეხვედრა

საქართველოს ადვოკატთა ასოციაციის თავმჯდომარის, დავით ასათიანის და საქართველოს პრემიერ-მინისტრის, ირაკლი კობახიძის შეხვედრა მნიშვნელოვანი ეტაპი გახდა ადვოკატთა უფლებების დაცვისთვის. შეხვედრის მთავარი თემა იყო „ადვოკატთა პროფესიის დაცვის შესახებ“ კონვენცია, რომელიც ევროპის საბჭოს მინისტრთა კომიტეტმა ახლახან დაამტკიცა.

დავით ასათიანმა პრემიერ-მინისტრს ხაზგასმით ესაუბრა კონვენციის მნიშვნელობაზე, რომელიც ადვოკატთა უფლებების გაძლიერებასა და მათი საქმიანობის თავისუფლების გარანტიებზეა მიმართული. ეს დოკუმენტი წარმოადგენს პირველ და ისტორიულ ნაბიჯს ევროპის მასშტაბით, რაც ადვოკატთა უფლებების დაცვის თვალსაზრისით უმნიშვნელოვანეს წინსვლას მოასწავებს.

„პრემიერ მინისტრთან შეხვედრამ ვფიქრობ, კონსტრუქციულად და ნაყოფიერად ჩაიარა. ვისაუბრეთ კონვენციის მნიშვნელობასა და საქართველოში მისი რატიფიცირების აუცილებლობაზე. კონვენციაზე ხელის მოწერის ცერემონია ლუქსემბურგში, მაისში გაიმართება და მე მაქვს ოპტიმისტური მოლოდინი, რომ საქართველო ერთ-ერთი პირველი იქნება ხელმომწერ სახელმწიფოთა შორის.“-აღნიშნა დავით ასათიანმა

კონვენციის ტექსტი დამტკიცდა 12 მარტს, რაც ადვოკატთა პროფესიული დამოუკიდებლობის განმტკიცების კუთხით უპრეცედენტო ნაბიჯია. იგი წარმოადგენს საერთაშორისო ინსტრუმენტს, რომელიც ადვოკატთა უფლებების გაძლიერებასა და მათი საქმიანობის თავისუფლების უზრუნველყოფას ითვალისწინებს.

საქართველოსთვის კონვენციის რატიფიცირება მნიშვნელოვანია არა მხოლოდ ადვოკატთა პროფესიული დამოუკიდებლობის განმტკიცების, არამედ სამართლის უზენაესობის განმტკიცებისა და სამართლიანი მართლმსაჯულების უზრუნველყოფის თვალსაზრისით. ამ გზით, ადვოკატთა როლი დემოკრატიულ საზოგადოებაში კიდევ უფრო აღიარებული და დაცული იქნება.