ანტიკორუფციული ბიუროს მიერ ორგანიზებული მნიშვნელოვან სამუშაო შეხვედრა

2025 წლის 21 მაისს, საადვოკატო ბიურო „ნაკაშიძე და პარტნიორებს“ წარმოადგენდა ადვოკატი ნათია ნაკაშიძე, რომელიც მიწვეული იყო საქართველოს ანტიკორუფციული ბიუროს მიერ ორგანიზებულ მნიშვნელოვან სამუშაო შეხვედრაზე. აღნიშნული შეხვედრა მიეძღვნა ქვეყნის შიგნით და გლობალურ კონტექსტში მნიშვნელოვან საკითხს საქართველოს კანონის „უცხოეთის აგენტების რეგისტრაციის აქტის“ განხილვას, რომელიც ძალაში შევა 2025 წლის 31 მაისიდან.

ახალი რეგულაცია საქართველოს საკანონმდებლო სივრცეში ინერგება აშშ-ის მიერ 1938 წელს მიღებული „უცხოელი აგენტების რეგისტრაციის აქტის“ (FARA) მოდელზე დაფუძნებით. როგორც ამერიკულ მოდელში, ასევე ქართულ ვერსიაშიც, ძირითადი მიზანია საჯარო გამჭვირვალობის ამაღლება, სახელმწიფო ინტერესების დაცვა და უცხოური გავლენების იდენტიფიცირება პოლიტიკური და სამოქალაქო სივრცეში.

კანონის თანახმად, საქართველოში მოქმედი ის იურიდიული და ფიზიკური პირები, რომლებიც ფინანსურად არიან დაკავშირებული უცხოურ წყაროებთან და ახორციელებენ საზოგადოებრივ საქმიანობას, შესაძლოა დაექვემდებარონ სპეციალურ რეგისტრაციას „უცხოეთის გავლენის გამავრცელებელი ორგანიზაციის“ სტატუსით.

კანონის პროექტში გამორჩეულად მნიშვნელოვან ასპექტს წარმოადგენს გამონაკლისები, რომლებიც ეხება უცხოეთში მცხოვრებ ქართველ ემიგრანტებს. კონკრეტულად, კანონით გარანტირებულია, რომ საქართველოს მოქალაქეობა მქონე ემიგრანტები მათ შორის, იტალიის რესპუბლიკის ტერიტორიაზე მყოფნი და მათი ოჯახის წევრები არ ექვემდებარებიან აღნიშნული რეგულაციის ფარგლებს.

ეს ნიშნავს, რომ მათი მხრიდან ფინანსური გადარიცხვები საქართველოში, აგრეთვე მათი მონაწილეობა ჰუმანიტარულ ან არასამთავრობო ორგანიზაციებში არ მიიჩნევა უცხოური გავლენის გავრცელებად და შესაბამისად, არ გააჩნია არც ადმინისტრაციული და არც სისხლისსამართლებრივი პასუხისმგებლობის რისკი.

შეხვედრაზე, რომელშიც მონაწილეობდა ადვოკატი ნათია ნაკაშიძე, განიხილეს კანონის ამოქმედების შემდეგი ეტაპები: რეგისტრაციის პროცედურები, შესაბამისი სამართლებრივი ვალდებულებები და მონიტორინგის მექანიზმები. ასევე განხილულ იქნა სამართლებრივი ნორმების ჰარმონიზაცია საერთაშორისო სამართლებრივ ჩარჩოებთან.

როგორც ბიუროს წარმომადგენლებმა აღნიშნეს, აღნიშნული კანონი ხელს შეუწყობს არა მხოლოდ სახელმწიფოს ინტერესების დაცვას, არამედ დაეხმარება საერთაშორისო დონორ ორგანიზაციებთან თანამშრომლობის ხარისხობრივი განვითარების ახალ ეტაპზე გადაყვანას დგება ბალანსი ეროვნული უსაფრთხოების მოთხოვნებსა და დემოკრატიულ ღირებულებებს შორის.

„უცხოეთის აგენტების რეგისტრაციის აქტი“ წარმოადგენს საქართველოს სახელმწიფოს მცდელობას მოირგოს გლობალური სამართლებრივი სტანდარტები ეროვნული სპეციფიკის გათვალისწინებით. ადვოკატ ნათია ნაკაშიძის მონაწილეობა აღნიშნულ შეხვედრაში ასახავს პროფესიულ ჩართულობას, რაც ამტკიცებს სამართლებრივი სფეროს მზაობას დისკუსიისა და პარტნიორული თანამშრომლობისთვის ქვეყნის დემოკრატიული განვითარებისა და კონსტიტუციური წესრიგის განმტკიცებისათვის.