მოსალოდნელი რისკები რუსეთის მოქალაქესთან ქირავნობის ხელშეკრულების დადებისას

საინტერესოა რა რისკების შემცველად გვევლინება გამქირავებლისათვის რუსეთის მოქალაქეებზე ბინებისა და სახლების გაქირავება. ერთი შეხედვით საქართველოში ჩამოსული რუსეთის მოქალაქეები გაურბიან თავისი სახელმწიფოს ამჟამინდელ ქმედებებს და აგრეთვე, სარგებლობენ ლტოლვილის სტატუსით. ყურადსაღებია ის ფაქტი, რომ SWIFT სისტემიდან გარიცხული ბანკებისათვის უცხოეთში ოპერაციების განხორციელება გართულდება, მაშასადამე, პრობლემას წარმოადგენს ტრანზაქციების განხორციელება რუსი მოქალაქეებისათვის.

გამოკითხული ქართველი მოქალაქეებისაგან ბევრი ამტკიცებს, რომ რუსეთიდან ჩამოსული იქაური მოქალაქეები ძირითადად ფინანსურად მყარ მდგომარეობაში იმყოფებიან და საქართველოში უკეთეს ყოველდღიურობასთან ფეხის აწყობას ცდილობენ. თუმცა, დღევანდელი მოცემულობითა და ინფორმაციით ცნობილია , რომ რუსეთის მოქალაქეები ვერ ახერხებენ საქართველოში თანხის განაღდებას და მხოლოდ ჯიბის ფულის იმედად რჩებიან. ამგვარად, არსებობს რისკები იმისა, რომ ისინი გამქირავებლისათვის გადახდისუუნარო დამქირავებლად გადაიქცნენ და ვერ მოხერხდეს ჯეროვნად ვალდებულების შესრულება – ვერ გადაუხადონ ქირა გამქირავებელს, უძრავი ქონების მესაკუთრეს.

ზემოაღნიშნულიდან გამომდინარე, გადახდისუუნარო საქართველოს არამოქალაქე პირი, რომლის ქვეყანაშიც არც თუ ისე სახარბიელო მდგომარეობაა, ნებისმიერ დროს შეიძლება გაემგზავროს საქართველოდან, სხვა ქვეყანაში ან რუსეთში დაძაბული ვითარების განეიტრალების შემთხვევაში დაბრუნდეს სამშობლოში და არ შეასრულოს დაკისრებული ვალდებულება. ამ დროს გამქირავებელი არა მხოლოდ ვერ იღებს შემოსავალს, არამედ ქირავნობის ხელშეკრულების ვადაზე ადრე მოშლით კარგავს სხვა უწინ პოტენციურ დამქირავებლებს და ყოველივეთი ადგება ზიანი.

მეორე შემთხვევაში, შესაძლოა გადახდისუუნარო რუსეთის მოქალაქემ არ გადაიხადოს ქირა, თუმცა არ დატოვოს ბინა. საქართველოს კანონმდებლობით კი დაუშვებელია მესაკუთრის მიერ თვითნებური შეღწევა გაქირავებულ ფართში დამქირავებლის გამოსახლების მოტივით. ამისთვის მრავალი პროცედურის გავლაა საჭირო, რასაც შესაძლოა საბოლოოდ სასამართლომდეც მივყავდეთ, დავის გადაწყვეტას კი სავარაუდოდ წლები დასჭირდება.

ასევე, ისიც უნდა გავითვალისინოთ, რომ რუსეთის მოქალაქეები კარგად არ იცნობენ ქართულ კანონმდებლობას და შესაძლოა მათ მიერ არასწორად იქნას აღქმული ქირავნობის ხელშეკრულების პირობები, რაც ცალსახად შეიძლება დავის და შემდგომში ზიანის გამომწვევი წინაპირობა იყოს გამქირავებლისათვის.

ავტორი: თეონა ადამაძე - კავკასიის უნივერსიტეტის იურიდიული ფაკულტეტის მე-3 კურსის სტუდენტი, იურისტი.

საიტი პასუხს არ აგებს აღნიშნულ სტატიაზე, მასში მოყვანილი ინფორმაციის სიზუსტესა და გამოყენებული ლიტერატურის ან საავტორო უფლებების დაცულობის საკითხზე