ისტორიული დღე საფრანგეთში: ნიკოლა სარკოზი ციხეში მეუღლესთან ერთად მივიდა - რა ელის La Santé-ში და რატომ მიაქვს „გრაფი მონტე-კრისტო“?

საფრანგეთის ისტორიაში ახალი, დრამატული ფურცელი იწერება. დღეიდან, 21 ოქტომბრიდან, რესპუბლიკის ყოფილი პრეზიდენტი, ნიკოლა სარკოზი, პატიმრობას იწყებს. ის თანამედროვე საფრანგეთის პირველი ექს-ლიდერია, რომელიც რეალურ პატიმრობას მოიხდის. სარკოზი პარიზის ცნობილ La Santé-ს ციხეში საკუთარი ფეხით, მეუღლის, კარლა ბრუნი-სარკოზის თანხლებით მივიდა.

ეს კადრები უკვე შეფასდა, როგორც ისტორიული. 70 წლის ყოფილი პრეზიდენტი ამ ღამეს უკვე საკანში გაათენებს.

ნიკოლა სარკოზი კატეგორიულად არ ეთანხმება გამამტყუნებელ განაჩენს. ის განსაკუთრებით აპროტესტებს მოსამართლის გადაწყვეტილებას, რომლის ძალითაც მას საპატიმროში ათავსებენ სააპელაციო საჩივრის სრულ განხილვამდე.

პარიზის უბანში, სადაც სარკოზი და კარლა ბრუნი ცხოვრობენ, 100-ზე მეტი მხარდამჭერი შეიკრიბა. ისინი საფრანგეთის ჰიმნს ასრულებდნენ და სკანდირებდნენ: "ნიკოლა, ნიკოლა!". მიმდებარე ღობეზე გაკრული იყო ტრანსპარანტები წარწერით: "გამაგრდი, ნიკოლა, მალე დაბრუნდი" და "ნამდვილი საფრანგეთი ნიკოლასთანაა".

მიუხედავად მძიმე მომენტისა, თავად ექს-პრეზიდენტი სიმტკიცეს ინარჩუნებს. "ციხის არ მეშინია. თავს მაღლა ავწევ, მათ შორის La Santé-ს კართანაც. ბოლომდე ვიბრძოლებ“, - განუცხადა მან La Tribune Dimanche-ს.

ცნობილი გახდა იმ ნივთების მცირე ჩამონათვალიც, რისი წაღების უფლებაც მას მისცეს. გამოცემა La Tribune Dimanche-ის ცნობით, სარკოზის ჩანთაში ტანსაცმელთან ერთად 10 ოჯახური ფოტოსურათი ედება.

თუმცა, ყველაზე დიდი ყურადღება იმ წიგნებმა მიიქცია, რომლებსაც პოლიტიკოსი საკანში წაიღებს. Le Figaro-სთან საუბარში მან დაადასტურა, რომ იმ სამ წიგნს შორის, რომლის შეტანის ნებაც დართეს, იქნება ალექსანდრე დიუმას „გრაფი მონტე-კრისტო“. ეს არჩევანი ბევრმა მიიჩნია სიმბოლურ მინიშნებად უსამართლოდ დაპატიმრებული კაცის შესახებ, რომელიც შურისძიებისთვის ემზადება.

შეგახსენებთ, 25 სექტემბერს ნიკოლა სარკოზის 5 წლით თავისუფლების აღკვეთა და 100 000 ევროს ოდენობის ჯარიმა შეუფარდეს. სასამართლომ ის ნაწილობრივ დამნაშავედ ცნო გახმაურებულ "ლიბიის საქმეში". ბრალდების მიხედვით, ის მონაწილეობდა დანაშაულებრივ შეთქმულებაში, რომლის მიზანიც 2007 წლის საპრეზიდენტო კამპანიისთვის ლიბიის ყოფილი დიქტატორის, მუამარ კადაფის რეჟიმისგან უკანონო დაფინანსების მიღება იყო.

იურიდიული პროცედურის თანახმად, სარკოზის სააპელაციო სასამართლოში გათავისუფლების მოთხოვნით სარჩელის შეტანა მხოლოდ დაპატიმრების შემდეგ შეეძლება. ამის შემდეგ მოსამართლეებს მისი მოთხოვნის განსახილველად ორთვიანი ვადა ექნებათ.

კონსულტაციისთვის დაგვიკავშირდით